ՕԵԿ անդամների թիվը 72 հազար է

Արդեն տեղեկացրել ենք, որ ՀՀԿ-ի կոալիցիոն գործընկեր ՕԵԿ-ը Սերժ Սարգսյանի համար եւս քարոզարշավ է անում, իհարկե, Սերժ Սարգսյանից առանձին: Yerkir.am-ի հետ զրույցում ԱԺ ՕԵԿ խմբակցության պատգամավոր Հովհաննես Մարգարյանը հայտարարեց, որ ՕԵԿ նախագահ Արթուր Բաղդասարյանը մինչեւ քարոզարշավի ավարտ լինել կհասցնի  ՀՀ բոլոր մարզերում եւ Երեւանի բոլոր վարչական շրջաններում:

ՕԵԿ-ական պատգամավորի հետ զրույցում պարզվեց, որ Արթուր Բաղդասարյանն արդեն եղել է Երեւանի վարչական շրջանների գրեթե կեսում. կուսակցականների հետ հանդիպումները բավական ակտիվ են անցնում, ինչպես վստահեցրեց Մարգարյանը՝ «լեփ-լեցուն դահլիճներում»: Մարդկանց, ըստ պատգամավորի, հետաքրքրում են իրականացվելիք բարեփոխումները, դրանց հետ շատ հույսեր են կապվում:

ՕԵԿ նախագահը քարոզարշավի է ելնում աշխատանքային օրվա ավարտից հետո, մարզեր էլ գնում են հիմնականում շաբաթ եւ կիրակի օրերին:

ՕԵԿ-ական պատգամավորին հարցրեցինք, թե այս պահի դրությամբ քանի՞ անդամ ունի ՕԵԿ-ը: Պարզվում է` նրանց թիվը շուրջ 72 հազար է: Հովհաննես Մարգարյանը վստահեցրեց, որ նրանց գերակշիռ մասը, հավատարիմ մնալով կուսակցության որոշմանը, ձայնը, իհարկե, կտա Սերժ Սարգսյանին: