Պուտինն ու Փաշինյանը կմասնակցեն Սանկտ Պետերբուրգում կայանալիք ԵԱՏՄ բարձրագույն խորհրդի նիստին

Ռուսաստանի նախագահ Վլադիմիր Պուտինի նախաձեռնությամբ դեկտեմբերի 21-22-ը Սանկտ Պետերբուրգում կկայանա ԱՊՀ պետությունների ղեկավարների ավանդական ոչ պաշտոնական հանդիպումը․ հայտնում է Կրեմլի մամուլի ծառայությունը։

Պուտինը կմասնակցի Եվրասիական տնտեսական բարձրագույն խորհրդի նիստին։ Մասնակիցները կքննարկեն ԵԱՏՄ-ին վերաբերող հիմնական հարցերը, ինտեգրման խորացման և միասնական շուկայի զարգացման հեռանկարները, ինչպես նաև կհաստատեն մի շարք փաստաթղթեր։ Մասնավորապես, նախատեսվում է ԵԱՏՄ-ի և Ինդոնեզիայի միջև ազատ առևտրի մասին համաձայնագրի ստորագրում։

Միջոցառումների շրջանակում նախատեսված են Ռուսաստանի նախագահի և մի շարք պետությունների ղեկավարների միջև երկկողմ բանակցություններ։

Հիշեցնենք, որ Նիկոլ Փաշինյանը դեկտեմբերի 21-22-ը կգտնվի Սանկտ Պետերբուրգում և կմասնակցի Եվրասիական տնտեսական բարձրագույն խորհրդի նիստին: