Սահմանվեց իշխանության մարմիններին ներկայացված հաշվետվությունների քննիչ հանձնաժողովի անդամների թիվը

ՀՀ Ազգային ժողովը սահմանեց մետաղական հանքարդյունաբերության ոլորտում ներդրումային ծրագրերի շրջանակներում գործադիր իշխանության մարմիններին ներկայացված և նրանց կողմից ընդունված ֆինանսական և այլ հաշվետվությունների օրինականությունը, հիմնավորվածությունը և արժանահավատությունն ուսումնասիրելու նպատակով իրավունքի ուժով ստեղծված Ազգային ժողովի քննիչ հանձնաժողովի անդամների թիվը:

«Արմենպրես»-ի հաղորդմամբ՝ հանձնաժողովը բաղկացած կլինի 11 անդամից:

Քննիչ հանձնաժողովի նախաձեռնող խմբի ներկայացուցիչ Սերգեյ Բագրատյանն ԱԺ որոշման նախագծով առաջարկել էր հանձնաժողովի անդամների թիվը սահմանել 18:

«Իմ քայլը» խմբակցության անունից ելույթ էր ունեցել խմբակցության ղեկավար Լիլիթ Մակունցը: Նա տեղեկացրել էր, որ խմբակցությունը միանում է նախաձեռնությանը և ունի մեկ առաջարկ: Լիլիթ Մակունցի խոսքով՝ քննիչ հանձնաժողովի կազմում 18 անձ ներառելը շատ է, ուստի խմբակցությունն առաջարկել էր 18-ը փոխարինել 11-ով:

Եզրափակիչ ելույթում Սերգեյ Բագրատյանն ընդունելի էր համարել Լիլիթ Մակունցի առաջարկը:

Որոշման նախագիծն ընդունվեց 111 կողմ և 1 ձեռնպահ ձայնով: