Հաղթողներից ոչ մեկը Եվրոպայի առաջնություն հրավիրված չէ. Արայիկ Բաղդադյան

«Միկա» մարզական համալիրում ավարտվեց ազատ ոճի ըմբշամարտի Հայաստանի առաջնության առաջին մրցումային  օրը: Գորգ դուրս եկան 55, 66, 74 և 120կգ քաշային ըմբիշները: Հաղթողների և մրցանակակիրների անունները կհրապարկվեն վաղը:

Հայաստանի հավաքականի գլխավոր մարզիչ Արայիկ Բաղդադյանը yerkir.am-ի հետ զրուցում նշեց, որ Ռուսլան Բասիևից հույսեր այլևս չկան:

Ուզում եմ նշել, որ Հայաստանի առաջնություն հաղթածներից կամ մրցանակակիրներից որևէ մեկը Եվրոպայի առաջնության հրավիրված չէ: Սա ուղղակի հավաքականը լիովին կոմպեկտավորելու համար էր:  Ինքներդ նայեցիք և տեսաք, որ հավասար մարտեր էին, եթե այսօր Միհրան Ջաբուրյանը՝ 55 կգ քաշային կարգի հաղթողը, վերջին վայրկյաններին հնարք կատարելով է հաղթում մրցակցին, ուրեմն այդ արդյունքն ինձ չի գոհացնում: Եվրոպայի առաջնության մասնակիցները կորոշվեն ըստ միջազգային կարգի մրցաշարերում ցույց տված արդյունքների:

Իսկ ի՞նչ կասեք  Մուսսա Մուրթազալիևի մասին, նա քաշային կարգն է փոխել: Ի՞նչ սպասելիքներ կան նրանից:

Մուրթազալիևը 74-ից տեղափոխվել է 84կգ քաշային կարգ: Նա դեռ ուզում է օլիմպիական մեկ ցիկլ ևս հանդես գալ: Հնարավոր է, որ այս տարի այդքան էլ լավ չմասնակցի:

Նոր լեգիոներներով հավաքականը կհամալրվի՞:

Չեմ կարծում, եթե համալրում լինի էլ, ապա միայն 120կգ քաշային կարգում: Ամեն դեպքում տարվա ընթացքում  մի քանի մրցաշարեր կանցկացնենք և կտեսնենք, որ քաշային կարգում խնդիրներ ունենք և ըստ այդմ էլ կորոշվի: