Համաձայնության չեկան. Թռչկանի համար պայքարը շարունակվում է

Այսօր հասարակայնությունը հերթական բողոքի ակցիան անցկացրեց կառավարության շենքի մոտ` պահանջելով դադարեցնել Թռչկանի ջրվեժի վրա ՀԷԿ-ի կառուցման աշխատանքները:

Իսկ երեկ ՀՀ բնապահպանության նախարարի նախաձեռնությամբ անցկացվեց այդ խնդրի քննարկում, որը ծայրաստիճան սուր բնույթ ստացավ: Հայտնի է, որ արդեն մի քանի օր է` Թռչկանի ջրվեժի պաշտպանները ակցիա են անցկացնում հենց ջրվեժի մոտ` փորձելով խանգարել շինարարներին`«Ռոբշին» ընկերությանը:

Ջրվեժը հատուկ պահպանվող տարածք է, բնության հուշարձան, որը պաշտոնապես ընդգրկված է Հայաստանի կառավարության կողմից հաստատված բնության հուշարձանների ցուցակում: Բնապահպանության նախարարությունը, անտեսելով այդ փաստը, ընկերությանը շինարարություն թույլատրող փաստաթղթեր,  բնապահպանական փորձաքննության դրական եզրակացություն եւ ջրօգտագործման թույլտվություն է տրամադրել: Փաստ է, որ շինարարությունն անուղղելի վնաս կհասցնի ջրվեժին, ինչը եղավ տարիներ առաջ Շաքիի հետ:

Շինարարական աշխատանքներն արդեն սկսվել են, փոսեր են արվել, փոխվել  է բնական լանդշաֆտը:

Հանդիպման ժամանակ նախարար Հարությունյանը ներկայացրեց քննարկման նպատակը` ջրվեժի շուրջ ստեղծված իրավիճակին տալ օբյեկտիվ գնահատական: Նա հայտարարեց, թե կարելի ասել, որ այդ հանդիպումը փոքր ՀԷԿ-ի կառուցման վերաբերյալ նոր հասարակական լսումներ են, բայց հրաժարվեց բնապահպանական փորձաքննության դրական եզրակացությունը եւ ջրօգտագործման թույլտվությունը ուժը կորցրած փաստաթղթեր համարել, այսինքն` հրաժարվեց արգելել շինարարական աշխատանքները եւ այդ քննարկումներին իրավաբանական ձեւակերպում տալ:

Հանդիպման մասնակից` փոքր ՀԷԿ-ը նախագծող «Հայէներգոնախագիծ» ինստիտուտի ներկայացուցիչները չեն էլ պատկերացրել, որ նախագծում պետք է լինի շրջակա միջավայրի վրա ազդեցության գնահատական` ՇՄԱԳ, այսինքն` փաստաթղթի այն հիմնական մասը, որի հիման վրա կայացվում է բնապահպանական փորձաքննության եզրակացությունը: Հետաքրքիր է, որ բնապահպանական փորձաքննությունը, փաստաթղթերն ուսումնասիրելիս, ՇՄԱԳ չի էլ պահանջել:

Իսկ նախարարության աշխատակազմի ղեկավար Էդգար Փիրումյանը նույնիսկ հրաժարվել է Թռչկանի ջրվեժն ընդունել որպես հատուկ պահպանվող տարածք` հայտարարելով, որ ջրվեժը ռեժիմ չունի, մարդ, որ երկար տարիներ աշխատել է Ջրային ռեսուսների կառավարման գործակալությունում, եւ հենց այդ գործակալությունն է բնության հատուկ պահպանվող հուշարձանների ցանկում ներառել ջրագրական հուշարձանների ցանկը:

Այնուհետեւ հասարակական սեկտորի ներկայացուցիչները հայտարարել են, որ որեւէ կետի շուրջ համաձայնություն ձեռք չի բերվում եւ իրենք շարունակելու են պայքարել Թռչկան ջրվեժի համար: