Թռչկանի ջրվեժը, կարծես, փրկվում է

«Ռոբշին» ՍՊԸ-ն դադարեցնում է Թռչկան գետի վրա կառուցվող հիդրոէլեկտրակայանի շինարարությունը եւ տեխնիկան դուրս է բերում շինարարական տարածքից:

Ընկերության տնօրինությունը տեղեկացնում է, որ իրենք հիմք են ընդունել բնապահպանության նախարարության առաջարկությունը, բացի այդ` որոշումը կայացվել է «քաղաքական տարաբնույթ շահարկումները կանխելու նպատակով»։

«Մենք միաժամանակ հույս ենք հայտնում, որ հետագա քննարկումների ընթացքում կգտնվեն բոլորի շահերն արտահայտող լուծումներ»,- ասվում է ընկերության տարածած հաղորդագրության մեջ։

Արդեն մեկ շաբաթ է բնապահպանները նստացույց են անում ջրվեժի մոտ՝ պահանջելով դադարեցնել շինարարությունը։ Ի դեպ, Թռչկանի ճակատագրով մտահոգ բնապահպանները եւ ակտիվիստները հայտարարություն էին տարածել վաղը բնապահպանության նախարարության շենքի առջեւ բողոքի ակցիա անցկացնելու վերաբերյալ: Բողոքի ակցիայի համակարգող Արման Վերմիշյանը yerkir.am-ին տեղեկացրեց, որ բողոքի ակցիան, այնուամենայնիվ, լինելու է, եւ ընկերության հայտարարությունը ոչինչ չի փոփոխում: Ավելին` նրանք սպասում են, որ կառավարությունն այդ կապակցությամբ պաշտոնական հայտարարություն կանի եւ ներողություն կխնդրի իր սխալի համար: