Վարչապետը մտահոգված է Թռչկանի ճակատագրով

Կառավարության այսօրվա նիստում վարչապետ Տիգրան Սարգսյանը բնապահպանության նախարար Արամ Հարությունյանից հետաքրքրվեց, թե ի՞նչ ընթացքի մեջ է Թռչկանի ջրվեժի հարցի քննարկումը:

Նախարարը նշեց, որ այցելել են ջրվեժ եւ տեղում համոզվել, որ կապալառու կազմակերպության կողմից իրականացվող շինարարական աշխատանքները բացարձակապես չեն վնասում Թռչկանի ջրվեժին:

«Մեր այցելության պահին ջրվեժը բնականոն գործում էր, եւ մեր չափումներով` այնտեղից վայրկյանում 400-500 լ ջուր էր գնում: Կառուցապատողին կարգադրվել է պահել այս սահմանված չափաքանակը»,- տեղեկացրեց Ա. Հարությունյանը` հավելելով, որ կապալառուի հետ նաեւ փոխադարձ պայմանավորվածություն է ձեռք բերվել, որ ամառվա երեք ամիսներին ՀԷԿ-ն ընդհանրապես չաշխատի:

«Բոլոր սահմանափակումներով հանդերձ, որոնք առաջադրվելու են Թռչկանի ջրվեժի բնականոն գործունեության համար, կառուցապատողին թույլատրվել է շարունակել աշխատանքները, հակառակ դեպքում, կարող են դատական գործընթացներ ծագել»,- նշեց նախարարը:

«Այս բացատրությունները բնապահպաններին տվե՞լ եք», - հետաքրքրվեց վարչապետը:

Դրական պատասխան տալով` Արամ Հարությունյանը հավելեց, որ հաջորդ շաբաթ նախատեսվում է եւս մեկ հանդիպում բնապահպանների հետ, որի ընթացքում նրանց բոլոր հարցերին պարզաբանում կտրվի: