Թռչկանի պաշտպանները չեն պատրաստվում վերադառնալ Երեւան

Թռչկանի ջրվեժի մոտ անժամկետ նստացույցի մասնակիցները չեն պատրաստվում վերադառնալ Երեւան, թեեւ այսօր կառավարության նիստում որոշակիություն մտցվեց հարցում. Թռչկանին տրվեց հատուկ պահպանվող տարածքի կարգավիճակ:

Yerkir.am-ի տեղեկություններով` «Պահպանենք Թռչկանի ջրվեժը» նախաձեռնության բնապահպան-ակտիվիստները դեռ գտնվում են ջրվեժի վերին հատվածում կառուցված վրանային ճամբարում եւ, նախնական տվյալներով, այնտեղ կմնան մինչ նոյեմբերի 7-ը:

Ավելի վաղ սոցիալական ցանցերում նախաձեռնության անդամները տարածել էին, որ երկուշաբթի օրը` նոյեմբերի 7-ին, նախատեսել են ծառատունկ: Նրանք նաեւ պատրաստվում են մաքրել տարածքը եւ գետից հանել արդեն տեղադրված խողովակները: Իսկ կիրակի օրը Լոռու մարզի Շիրակամուտ գյուղում տեղի կունենա տոնական ռոք համերգ, որին մասնակցելու համար Երեւանից կժամանեն մեծ թվով երկրպագուներ: