ՄԱԿ-ի Գլխավոր քարտուղարը աշխարհին կանխատեսել է վերջին 80 տարվա ընթացքում աննախադեպ տնտեսական անկում

Աշխարհը կարող է բախվել վերջին 80 տարվա ընթացքում աննախադեպ տնտեսական անկման հետ կորոնավիրուսի համավարակի հետեւանքով: Այդ մասին ուրբաթ հայտարարել է ՄԱԿ-ի Գլխավոր քարտուղար Անտոնիու Գուտերեշը՝ Նոբելյան մրցանակի ֆորումի ժամանակ տեսաձեւաչափով ելույթ ունենալիս, հաղորդում է ՏԱՍՍ-ը:

«Համավարակի սոցիալական եւ տնտեսական վնասը հսկայական է եւ շարունակում է աճել,-նշել է նա:-Չկա պատվաստանյութ, որը կարող է շտկել արդեն հասցված վնասը»: «Մենք կանգնած ենք վերջին 80 տարվա ընթացքում համաշխարհային աննախադեպ տնտեսական անկման առաջ,-նախազգուշացրել է Գուտերեշը:-Աճում է ծայրահեղ աղքատության եւ սովի սպառնալիքը»:

ՄԱԿ-ի ղեկավարը նշել է, որ այդ իրավիճակի պատճառն արդեն գոյություն ունեցող անհավասարությունն ու հասարակության անարդար կառուցվածքն է, որը պարզապես վեր է հանել համավարակը:

Գուտերեշը հայտարարել է, որ երկրների՝ համավարակին ուղղված արձագանքը համակարգված չէր. այդ իրավիճակն անհրաժեշտ է ուղղել կորոնավիրուսի պատվաստանյութը բաշխելիս:

«Համավարակը վերածվել է աննախադեպ ճգնաժամի, որում աշխարհը բախվել է ընդհանուր թշնամու հետ: Ցավոք, կառավարությունները չեն մշակել միասնական արձագանք՝ ուղղված այդ համաշխարհային սպառնալիքին»,-ասել է գլխավոր քարտուղարը:

Նա հիշեցրել է, որ Առողջապահության համաշխարհային կազմակերպությունը ներկայացրել է փաստացի տեղեկատվություն ու ապահովել գիտական առաջնորդություն համավարակի առաջին օրերից ի վեր, որը պետք է դառնար համաշխարհային համակարգված գործողությունների հիմքը: «Սակայն արձագանքը հատվածական էր եւ քաոսային: Երկրները, տարածաշրջանները եւ անգամ քաղաքները մրցել են միմյանց հետ առաջին անհրաժեշտության պարագաներն ու առաջատար բուժաշխատողներին ստանալու համար»,-փաստել է Գուտերեշը:

«Մենք չենք կարող թույլ տալ, որ նույն իրավիճակը կրկնվի կորոնավիրուսի դեմ նոր պատվաստանյութի մատակարարման դեպքում, որը պետք է դառնա համընդհանուր սպառման դեղամիջոց»,-ամփոփել է նա: