Փաշինյանի ֆեյսբուքյան էջի նկատմամբ հետաքրքրությունն աննախադեպ անկում է գրանցել. անգամ ֆեյքերին մոբիլիզացնելը լուրջ արդյունքներ չի ապահովում. «Մեդիա պաշտպան»

«Մեդիա պաշտպան»-ի փորձագետները երեկ ուսումնասիրել էին ՀՀ վարչապետ Նիկոլ Փաշինյանի ֆեյսբուքյան էջը՝ ներկայացնելով փաստեր առ այն, որ Փաշինյանի ֆեյսբուքյան էջի նկատմամբ հասարակության հետաքրքրությունն աննախադեպ անկում է գրանցել: Ըստ «Մեդիա պաշտպան»-ի ֆեյսբուքյան էջում հրապարակված տվյալների՝ վարչապետի ֆեյսբուքյան հրապարակումների հավանումների, դիտումների և տարածումների ցուցանիշը նվազել է ավելի քան 90 %-ով:

«Մեդիա պաշտպան»-ի փորձագետները նաև անուղղակի ձևով հորդորել էին Նիկոլ Փաշինյանին նվազեցնել անիմաստ, աննպատակ ֆեյսբուքյան ակտիվությունը, քանի որ հրապարակումների քանակն ուղիղ ազդեցություն ունի հրապարակման դիտողականության վրա:

«Քիչ առաջ ՀՀ վարչապետն անուղղակի ձևով արձագանքելով «Մեդիա պաշտպանի» փորձագետների երեկվա անդրադարձին՝ հրապարակել է «Ոչ մի մուկ ու ոչ մի ձուկ չի պլստալու. մի փոքր ժամանակագրություն» վերտառությամբ մի տեսանյութ, որը քարոզչական բնույթի անորակ արտադրանք է, սակայն իր արտաքին տեսքով գրավիչ է ֆեյսբուքյան լսարանի համար:

Նիկոլ Փաշինյանի այս գրառումը մեր ուշադրությանն արժանացավ մեկնաբանություններում կեղծ օգտատերերի ընդգծված ակտիվության պատճառով: Այդպիսիք, որպես կանոն, աչքի են ընկնում ոչ վերբալ արտահայտչամիջոցների (սմայլիկներ, դրոշներ, փուչիկներ) գործածությամբ: 

Փաշինյանն, ըստ էության, հրահանգել է մոբիլիզացնել իր ենթակայության տակ գտնվող ֆեյքային ողջ բազան՝ փորձելով հերքել մեր կողմից երեկ ներկայացրած փաստերը:
Արդյունքում 1 ժամվա ընթացքում Նիկոլ Փաշինյանի հրապարակումը ստացել է 2100 հավանում, 293 մեկնաբանություն և 270 տարածում: Անզեն աչքով էլ տեսանելի է, որ անգամ իշխանական ֆեյքերի մոբիլիզացիայի պարագայում, Նիկոլ Փաշինյանի էջում հնարավոր է լինում ապահովել նախկին ակտիվության հազիվ 10 տոկոսը:

Ի դեպ, նկատենք, որ Փաշինյանի՝ հիշատակված գրառման մեկնաբանություններին ուսումնասիրության ընթացքում նկատեցինք նաև բովանդակային կոնտենտ արտադրող կեղծ օգտատերերի: Անընդունելի համարելով այն փաստը, որ միտք արտադրելու ունակ մարդիկ զբաղված են կեղծ օգտատիրոջ անվան տակ իշխանությանը ծառայություններ մատուցելով, «Մեդիա պաշտպան»-ը բոլոր այդ մարդկանց սիրով հրավիրում է համագործակցության՝ իրենց մտավոր ունակություններն առավել արդյունավետ ու ազնիվ նպատակների ծառայության համար:

Մենք պարբերաբար կազմակերպում ենք մեդիագրագիտության բարձրացմանն ուղղված դասընթացներ, քննարկումներ և կոնֆերանսներ, որոնց մասնակցելու ենք հրավիրում բոլոր ցանկացողներին, այդ թվում՝ վերոնշյալ խմբերին:
Մանրամասներին ծանոթանալու համար կարող եք անձնական նամակ գրել «Մեդիա պաշտպան» նախաձեռնության ֆեյսբուքյան էջին: Անձնական տվյալների գաղտնիությունը երաշխավորում ենք»,-ասվում է «Մեդիա պաշտպան»-ի էջում հրապարակված գրառմամբ մեջ: