Խմբագրական. Հատուցման իրաւա-քաղաքական շեշտադրումը...

Բովանդակ հայութեան արդարահատոյց պահանջատիրական պայքարը յարատեւ է ու միաժամանակ հանգրւանային: Այդ իսկ պատճառով փոփոխման են ենթարկւում լոկ՝ պայքարի միջոց-եղանակները, բայց երբեք՝ գաղափարը, էութիւնը, ոգին ու նպատակը…

Բովանդակ հայութեան արդարահատոյց պահանջատիրական պայքարը յարատեւ է ու միաժամանակ հանգրւանային: Այդ իսկ պատճառով փոփոխման են ենթարկւում լոկ՝ պայքարի միջոց-եղանակները, բայց երբեք՝ գաղափարը, էութիւնը, ոգին ու նպատակը…

Հայոց Ցեղասպանութեան 105-րդ տարելիցին եւս ողջ Հայաշխարհը միեւնոյն պահանջատիրութեան ռազմավարական դրոյթները սեւեռակէտ դարձնելով, ամենեւին նոր պայմանների՝ համաշխարհային մակարդակով նոր համավարակի արտակարգ իրավիճակում է արտայայտում իր համազգային կամքը յաչս՝ նոյն համաշխարհային ընտանիքի, քաջ գիտակցելով, որ դոյզն իսկ չի նսեմանալու իր արդար պայքարի էութիւնը: Աւելին, տեղ-տեղ նոյնիսկ իրաւաքաղաքական, պատմական ու բարոյական արժէքներ կրող իր պահանջատիրութիւնը աւելի արդիական ու աւելի ազդեցիկ է արտացոլւում միջազգային հասարակայնութեան հարթութիւններում:

105-րդ հանգրւանը, սակայն, ազգի ու ժողովրդի «պատմական յիշողութեան» օրինաչափութեամբ, մեզ յուշում է, որ սեփական պայքարի գերնպատակը դա՝ ցեղասպանութեան հետեւանքով հայ ժողովրդի ամբողջական, լիարժէք, արդար, բայց անտեսւած իրաւունքների հատուցման ապահովումն ու կենսագործումն է, ի խնդիր նոյն հայութեան ու Հայաստանի ազգային թէ՛ պետական ամբողջական անվտանգութեան ու բնականոն զարգացման:

Միեւնոյն «պատմական յիշողութիւնը» մեզ ուսուցանում է, որ որպէս Ազգ ու Պետութիւն գոյատեւելու նախապայման՝ նշեալ անվտանգութիւնն ու զարգացումը երաշխաւորւելու են սրանից 100-ամեակ առաջ կնքւած եւ ապա՝ աշխարհա-քաղաքական սակարկութիւնների արդիւնքում չեղարկւած «Սեւրի պայմանագրի» ու դրա հիմքի վրայ «Վիլսոնեան» Իրաւարար ու անբեկանելի հռչակագրի շեշտադրմամբ ու վերագործարկմամբ:

Ահաւասիկ, պահանջատիրութեան 105-րդ տարելիցի ու ժամանակին դրա ամբողջական հատուցման-իրաւատիրական ակտ՝ «Սեւրի» 100-ամեակի համընկնումը 2020-ի սոյն թւականին, աւելիով է պարտաւորեցնում հային ու Հայաստանին՝ վերաժեւորելու եւ ինչու ոչ, գերարժեւորելու եւ ընթանալու նոյն «պատմական յիշողութեան» սկզբունքների կեանքի կոչման երկար ու տատասկոտ ուղին, մինչեւ վախճանական նպատակի՝ Հայոց Ցեղասպանութեան, հայրենազրկման ու մէկ խօսքով՝ Հայ Դատի լուծման ու հատուցման փառապանծ հանգրւան…:

ԴԵՐԵՆԻԿ  ՄԵԼԻՔԵԱՆ

«ԱԼԻՔ»  ՕՐԱԹԵՐԹԻ  ԳԼԽԱՒՈՐ  ԽՄԲԱԳԻՐ