COVID-19-ի դեմ պայքարի չինական փորձը. «Ժենմին ժիբաո»

Նոր կորոնավիրուսի մասին տեղեկությունները դեռևս սահմանափակ են, սակայն դրա տարածումը վերահսկելու ռազմավարությունը մշակված է` աղբյուրները և վարակման ճանապարհները, նաև ռիսկային խմբերի` վիրուսի նկատմամբ  ընկալունակությունը հաշվի առնելով:  Այս մասին, ըստ չինական «Ժենմին ժիբաո» պարբերականի, ասել է  Հիվանդությունների վերահսկողության և պրոֆիլակտիկիայի չինական կենտրոնի գիտաշխատող Ու Ցզունյուն, որը չինական փորձը ներկայացրել է ավելի քան 80 պետությունների ներկայացուցիչների. տեղեկացնում է Yerkir.am-ը:

Նրա խոսքով`վարակի աղբյուրները հայտնաբերելիս անհրաժեշտ է անհապաղ մեկուսացնել ու բուժել: Վարակի տարածումը հարկավոր է  կանխել դիմակներ կրելով, ձեռքերը լվանալով ու տարածքները օդափոխելով: Նաև անհրաժեշտ է որոշակի հեռավորություն պահել մարդկանց միջև, պաշտպանել ռիսկային խմբերում գտնվողներին:  Այսպես` կարևորագույն պայման է` մեկուսացնել վարակի աղբյուրներին ու խոցելի խմբերին:

Ըստ չինացի փորձագետի` արևմտյան երկրներում խորհուրդ չի տրվում դիմակներ կրել: Նա նշում է, որ վնասակար նյութերի դուրսբերումն օրգանիզմից ամենաշատը տեղի է ունենում գաղտնի շրջանի վերջում և մինչ ախտանշանների ի հայտ գալը, այլ կերպ ասած` եթե առողջ մարդը հանդիպի հիվանդի այդ ժամանակաշրջանում, նույնիսկ եթե ախտանշաններ դեռ չկան, վարակվելու ռիսկը մեծ է: Ահա, թե ինչու է անհրաժեշտ, որ առողջ մարդիկ էլ դիմակ կրեն:

Հիմնականում ի՞նչ վայրերում է գտնվում վիրուսը: Չինացի մասնագետի խոսքով` ամենավտանգավոր  տեղերը բժշկական հաստատություններն են ու ընտանիքները` վարակված անդամներով, նաև` վերելակները և հասարակական տրանսպորտը: Մարդիկ իրենց տանն ու բաց տարածքներում դիմակ կրելու պետք չունեն, սակայն բազմամարդ վայրերում դա անհրաժեշտ է:

«Անհրաժեշտ է տարբեր բուժում կիրառել տարբեր տիպի հիվանդություններ ունեցողների համար: Դա շատ կարևոր  փորձ է: Նախ` կատարվում է հիվանդությունը թեթև տանող պացիենտների կենտրոնացված ընդունում, կատարվում է մեկուսացում: Հսկողության տակ են առողջական վիճակի հիմնական ցուցանիշները: Վիճակի վատթարացման դեպքում պացիենտն անմիջապես ուղարկվում է հիվանդանոց: Ծանր ու ծայրահեղ ծանր ձևերով պացիենտների բուժումն  անհրաժեշտ է իրականացնել հատուկ բժշկական կառույցներում, որովհետև մահացությունը բավականին բարձր է, իսկ հիվանդության զարգացումը` համեմատաբար արագ: Այդ կապակցությամբ բազմամակարդակային զննումն ու բուժումը չափազանց կարևոր է: Բոլոր դեպքերում կարևոր է թթվածնային թերապիան, քանի որ թոքերը չեն կարող գործել բնականոն ռեժիմով: Ծանր վիճակում գտնվողների պարագայում  միայն թթվածինը բավարար չէ, հարկավոր է շնչառողություն ախահովել սարքերով»,- նշում է Ու Ցզունյուն: