ԱՄՆ Հայ դատի հանձնախումբը երկրից պահանջում է վերջ տալ Ադրբեջանի նկատմամբ նպաստավոր առևտրային քաղաքականությանը

ԱՄՆ Հայ դատի հանձնախումբը հայտարարարություն է տարածել՝ պնդելով, որ Ամերիկայի Միացյալ Նահանգները պետք է վերջ տա Ադրբեջանի նկատմամբ դրական իմաստով նպաստավոր առևտրային վերաբերմունքին. Yerkir.am-ին հայտնում են ԱՄՆ Հայ դատի հանձնախմբից:

Հայտարարությունն ուղղված է ԱՄՆ-ի առևտրային ներկայացուցչությանը, որի գործունեության ոլորտում ներառված են ԱՄՆ-ի առևտրային օրենսդրության մշակումը, առևտրային համաձայնագրերի կազմումը, ինչպես նաև արտաքին առևտրային քաղաքականության համակարգումը: Նշվում է՝ 2020թ. հունվարի 17-ին մտադրություն ունի վերանայելու Բաքվի՝ կողմնակալ ընդհանրացված համակարգի շրջանակում իր արտադրանքն ԱՄՆ արտահանելու թույլտվության ընդունելի լինելը:

Նշվում է՝ ծրագրի շրջանակում աշխարհի 119 երկիր առևտրային ձեռնտու պայմաններով հազարավոր ապրանքներ է արտահանում դեպի ԱՄՆ: Հավելվում է՝ ծրագրում ներառված են նաև Հայաստանը, Վրաստանն ու Ադրբեջանը:

Իշխանություններին հղված նամակում ԱՄՆ Հայ դատի հանձնախմբի կառավարական գործերով տնօրեն Թերեզա Երիմյանը մանրամասնել է, թե ինչու ԱՄՆ-ն պետք է վերանայի Ադրբեջանի նկատմամբ նպաստավոր առևտրային վերաբերմունքը:

ԱՄՆ Հայ դատի հանձնախումբը մի քանի պատճառ է նշում: Դրանք են՝ 

• Հայաստանը շրջափակելու նպատակով Ադրբեջանի և Թուրքիայի պայմանավորվածությունը,
• Ադրբեջանի կողմից մարդասպան Ռամիլ Սաֆարովի արդարացումը,
• Ադրբեջանի իշխանությունների կողմից ռասիստական քաղաքականության դրսևորումը և էթնիկ հայերին այցագրերի չտրամադրումը: