Վարչապետի լիբանանյան այցի արդյունքը` հանձնարարականի տեսքով

Այսօր կառավարության նիստում վարչապետ Կարեն Կարապետյանը հանձնարարական տվեց Լիբանան իր այցի պաշտոնական արդյունքների վերաբերյալ: Վարչապետի խոսքով` այցի շրջանակներում տեղի են ունեցել մի շարք հանդիպումներ Լիբանանի գործարար շրջանակների, բարձրագույն ղեկավարության, բանկային համակարգի պատասխանատուների, հայ համայնքի հետ: Այդ հանդիպումների ընթացքում ձեռք են բերվել մի շարք համաձայնություններ առևտրա-տնտեսական համագործակցության վերաբերյալ:

Ելնելով դրանից` վարչապետը հանձնարարեց ԱԳ, տնտեսական զարգացման և ներդրումների, էներգետիկ ենթակառուցվածքների և բնական պաշարների, գյուղատնտեսության, տարածքային կառավարման և զարգացման նախարարներին` մեկամսյա ժամկետում ձեռնարկել միջոցներ այցի ընթացքում ձեռք բերված պայմանավորվածությունները անհրաժեշտ ժամկետում կատարելու ուղղությամբ և կառավարության աշխատակազմին ներկայացնել հայ-լիբանանյան միջկառավարական հանձնաժողովի աշխատանքների ակտիվացման, հերթական նիստի նախապատրաստման, հայ-լիբանանյան ներդրումային հիմնադրամի ստեղծմանն ուղղված գործողությունների վերաբերյալ առաջարկություններ: