Արծվիկ Մինասյանը զեկուցեց ներմուծման գործընթացի հանձնարարականի վերաբերյալ

Այսօր կառավարության նիստում էկոնոմիկայի նախարար Արծվիկ Մինասյանը զեկուցեց վարչապետի` սույն թվականի մայիսի 19-ի հանձնարականի վերաբերյալ: Հանձնարարվել էր ներկայացնել ներմուծման վերաբերյալ բոլոր անհրաժեշտ փաստաթղթերը էլեկտրոնային եղանակով, որպեսի ներմուծողները ստանան լիարժեք ու ամբողջական տեղեկատվություն:

Նախարարը նշեց, որ ՀՀ արտաքին առևտրային ռեժիմը տարբերվում է երեք հիմնական ուղղություններով, մասնավորապես՝ երրորդ երկրներ, որոնց հետ Հայաստանը չունի ազատ առևտրի համաձայնագիր, երրորդ երկրներ, որոնց հետ Հայաստանը ունի ազատ առևտրի համաձայնագիր, և ԵԱՏՄ երկրներից ներմուծվող ապրանքներ: Մյուս առանձնահատկությունը պայմանավորված է նրանով որ ԵԱՏՄ շրջանակներում երկու ցանկ կա, առաջինը վերաբերում է թերզարգացած երկրների ապրանքների ներմուծման արտոնությունների տրամադրմանը, երկրորդ ցանկը վերաբերում է զարգացող երկրներից ներկրմանը, որտեղ գործում են արտոնյալ դրուքաչափեր` մինչև 25 տոկոսի չափով:

«Ելնելով հանձնարարականի արդյունավետ կատարման անհրաժեշտությունից` առաջին փուլում առանձնացվել են այն հիմնական ապրանքատեսակները, որոնք հանրության շրջանում մեծ հետաքրքրություն ունեն, դրանք են՝ ալյուր, ցորեն, շաքարավազ, արևածաղկի յուղ, հավի միս, նարինջ, բանան, բենզին, դիզվառելիք: Արդեն մշակվել են անհրաժեշտ տեղեկատվական հուշաթերթեր, ուղարկվել են ՊԵԿ-ին և սննդի անվտանգության ծառայությանը: Համաձայնությունների ավարտից հետո այն մեկ շաբաթվա ընթացքում կտեղադրենք մեր կայքէջում: Սա շարունակական բնույթ է կրելու, որպեսզի անցում կատարենք սպառողական զամբյուղի մնացած ապրանքատեսակներին»,- ասաց Արծվիկ Մինասյանը:

Նախարարը հավելեց, որ աշխատանքներ են տարվում ծրագրային ապահովության մասով` ցանկացած ապրանքատեսակի հետ կապված` ցանկացած երկրից ներմուծման դեպքում ներմուծողը հեշտությամբ կկարողանա օգտվել այդ ծառայությունից՝ ընդամենը հավաքելով տվյալները: