Հանձնարարական 260 հանձնարարականի կատարման հսկողության վերաբերյալ

Այսօր կառավարության նիստում վարչապետ Կարեն Կարապետյանը հանձնարարեց արդեն տրված հանձնարարականների կատարման նկատմամբ հսկողություն սահմանելու վերաբերյալ: Վարչապետի խոսքով` կառավարության աշխատակազմի ղեկավարի կողմից զեկուցվել է, որ գործադիր մարմինների ղեկավարներին տրվել էր շուրջ 260 հանձնարարական:

Հաշվի առնելով հանձնարարականների միջոցով բարձրացված հարցերի կարևորությունը, ըստ վարչապետի, անհրաժեշտ է անդրադառնալ դրանց կատարողականների հսկողությանը և արձանագրված արդյունքներին: Այդ նպատակով կառավարության աշխատակազմի ղեկավարին հանձնարարվեց մեկ շաբաթվա ժամկետում ամփոփել և ներկայացնել հաշվետվություն տրված հանձնարարականների կատարման արդյունքների վերաբերյալ, կազմակերպել խորհրդակցություն հանրապետական գործադիր մարմինների ղեկավարների մասնակցությամբ:

«Քանի որ մենք հանձնարարել էինք գործադիր մարմինների ղեկավարներին` ամփոփել ութ ամիսը, այս հանձնարարականը ուղղում ենք նաև ՀՀ մարզպետներին` մինչև ամսվա վերջը հանրությանը ներկայացնել հաշվետվություն կատարված աշխատանքների, ներդրումային աշխատանքների, ստեղծված աշխատատեղերի, սեփական եկամուտների, աղբահանության և այլ հայտանիշների մասին»,- ասաց Կարեն Կարապետյանը: