Աղավնաձորցիները սպասում են նոր գյուղնախարարին ուղղված հանձնարարականի կատարմանը

Վայոց ձորի Աղավնաձոր համայնքի ղեկավար Աշոտ Գալստյանը Yerkir.am-ի հետ զրույցում ասաց, որ աղավնաձորցիները երեխաներին այլևս չեն արգելում գնալ մանկապարտեզ ու դպրոց, բայց դա չի նշանակում, որ նրանց խնդիրները լուծում են ստացել:

Հիշեցնենք, որ Աղավնաձոր համայնքի բնակիչները տևական ժամանակ է` բողոքում են, որ իրենց` նախորդ տարի մթերված խաղողի գումարները չեն վճարվել: Նրանք իրենց բողոքն արտահայտում  են տարբեր ձևերով, այդ թվում՝ ճանապարհներ փակելով և երեխաներին դպրոց ու մանկապարտեզ գնալ թույլ չտալով:

Գալստյանի խոսքով՝ հիմա գյուղացիները կտրուկ քայլերի չեն դիմում, որովհետև սպասում են նոր նախարարի գործողություններին: «Սպասում ենք, որ գյուղատնտեսության նոր նախարարը  կատարի հանձնարարականները: Մեր խնդիրները լուծելու հանձնարարական է ստացել, տեսնենք` ինչ կլինի»,- ասաց գյուղապետը, ով ևս խաղող արտադրող է և անձամբ բախվել է այդ խնդրին: