Շատ հնարավոր է, որ կողմ քվեարկենք. Գալուստ Սահակյանը՝ Հովիկ Աբրահամյանի հանձնարարականի մասին

ԱԺ ՀՀԿ խմբակցության ղեկավար Գալուստ Սահակյանը դրական է գնահատում ՀՀ վարչապետ Հովիկ Աբրահամյանի հանձնարարականը` նախապատրաստել օրենքի նախագիծ, որով, մինչեւ Սահմանադրական դատարանի 2014-ի ապրիլի 3-ի որոշմամբ նախատեսված` «Կուտակային կենսաթոշակների մասին» օրենքի վերաբերյալ օրենսդրական փաթեթի ընդունումը, Ազգային ժողովի կողմից կկասեցվի տույժերի հաշվարկը։

«Դեռևս քննարկման փուլում է այդ ամենը, դրական եմ գնահատում այդ հանձնարարականը, բայց տեսնենք, թե մասնագետների քննարկման արդյունքում ինչ կստացվի»,- Yerkir.am-ի հետ զրույցում ասաց Գալուստ Սահակյանը: Նա նշեց, որ փորձագետները նախ պետք է իրենց կարծիքը հայտնեն, որից հետո նոր այն կդրվի քննարկման խորհրդարանում:

Մեր հարցին, թե ինչպե՞ս կքվեարկի քաղաքական մեծամասնությունը, հնարավո՞ր է` դեմ կքվեարկեն, Գալուստ Սահակյանը պատասխանեց, որ քանի դեռ նախագիծը չի մտել խորհրդարան, և որևէ քննարկում չի եղել ՀՀԿ խմբակցության ներսում, դեռևս չի կարող որևէ բան ասել քվեարկության վերաբերյալ: «Բայց ես դրական մոտեցում ունեմ: Շատ հնարավոր է, որ կողմ քվեարկենք»,- ասաց նա: