Լավրովի այցը Հայաստան հերթականներից մեկն էր. Կորյուն Նահապետյան

ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ, ՀՀԿ-ական պատգամավոր Կորյուն Նահապետյանի կարծիքով` Ռուսաստանի ԱԳ նախարար Սերգեյ Լավրովի այցը Հայաստան հերթականներից մեկն էր:

Yerkir.am-ի հարցին, թե, ընդհանուր առմամբ, ինչի՞ն էր միտված և ինչո՞վ էր նշանավորվում Լավրովի այցը Հայաստան, նա պատասխանեց. «Ես կարծում եմ, որ Լավրովի այցը պետք է, ընդհանուր առմամբ, դիտել որպես հերթական այց, որի ժամանակ երկուստեք հետաքրքրություն ներկայացնող խնդիրներ են քննարկվել: Բնականաբար, անդրադարձ է եղել ինչպես արտաքին քաղաքական, այնպես էլ տարածաշրջանային հարցերին»:

Պատասխանելով դիտարկմանը, թե տեսակետ է շրջանառվում, որ Լավրովի` Հայաստան այցի մեջ որոշակի պահանջատիրական նկրտումներ կային, Նահապետյանը պատասխանեց. «Որոշակի շրջանակներ, այդ թվում՝ և լրատվականները, վարկածներ են առաջ քաշում և հետո այդ վարկածների շուրջ սկսում մեկնաբանություններ ստանալ: Այն, ինչ ներկայացվել է պաշտոնական հաղորդագրության մեջ, կուզենայի որ հենց այդ շրջանակներում լիներ ամեն ինչ»:

Պատգամավորի խոսքով`հրապարակային են եղել հանդիպումները, ներկայացվել է պաշտոնական հաղորդագրություն:

«Ես լսել եմ տեսակետ, որ իբրև թե պահանջներ են ներկայացվել Լավրովի կողմից և նման կարգի այլ շեշտադրումներ: Կարծում եմ, որ դրանք սոսկ ենթադրությունների մակարդակի վրա են և որևէ բավարար հիմք չունեն, և դրանց շուրջ ինտիրգներ ստեղծելը ճիշտ չէ»,- հայտարարեց պատգամավորը: