ՊՆ-ն նպատակասլաց աշխատանք է կատարում. Կորյուն Նահապետյան

Այսօր ԱԺ քառօրյա նիստում քննարկվում էր 2015թ. բյուջեի կատարողականը:

ԱԿ խմբակցության պատգամավոր Նիկոլ Փաշինյանը հարց ուղղեց զեկուցող` ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանին Հայաստանի ու Ռուսաստանի միջև սպառազինություն մատակարարելու մասին համաձայնագրի կատարման ձգձգումների մասին:

Կորյուն Նահապետյանը նշեց, որ պաշտպանության նախարարը պարզաբանում տվել է` այդ հարցի հետ կապված, և որ աշխատանքներն ընթացքի մեջ են: Նա հավելեց, որ, ելնելով բանակցային գործընթացի մանրամասներից, կողմերի միջև վստահության մթնոլորտը չխաթարելու տրամաբանությունից, չի կարող հրապարակել տեղեկություններ աշխատանքների մասին:

«ՊՆ-ն նպատակասլաց աշխատանք է կատարում` վարկային համաձայնագրով նախատեսված միջոցների ձեռք բերման համար»,- ասաց Կորյուն Նահապետյանը:

Ինչ վերաբերում է ՊՆ-ում չարաշահումների հայտնաբերմանը, նրա կարծիքով՝ նման բան եղել է նաև նախկինում: Նահապետյանը վստահություն հայտնեց, որ մեղավորները կպատժվեն:

«Իմ ունեցած տվյալներով` վերջին դեպքերի հետ կապված, պետությանը պատճառված վնասը որոշակի վերականգնվել է: Չափերը չեմ կարող այս պահին հրապարակել, բայց քայլեր ձեռնարկվել են»,- ասաց նա: