Պուտինին ասացի, որ նեղսրտել եմ. Էրդողան

Երեկ Թուրքիայի նախագահ Ռեջեփ Թայիփ Էրդողանը 1915 թվականի իրադարձությունների մասին օրակարգի քննարկման ժամանակ անկեղծ հայտարարություններ է արել. գրում է թուրքական Haberler-ը:

Նշելով, որ ՌԴ նախագահ Վլադիմիր Պուտինին իր բացասական վերաբերմունքն է արտահայտել Հայոց ցեղասպանության 100-րդ տարելիցի կապակցությամբ նրա` Հայաստան այցելելու որոշման և դիրքորոշման համար, Էրդողանն ասել է. «Պուտինի հետ հեռախոսազրույց ունեցա և հայտնեցի, որ նեղսրտել եմ: Ասացի, որ մեր հարաբերություններին վնասել է, և որ պետք է նորից աչքի տակով անցկացնենք դրանք»:

Խոստովանելով, որ, մայիսի 9-ին Մոսկվա հրավիրված լինելով հանդերձ, չի մեկնի Ռուսաստան ապրիլի 24-ին Պուտինի՝ Երևանում կայացած հիշատակի արարողությանը մասնակցելու պատճառով, Թուրքիայի նախագահը հյուրերին հայտնել է, որ Թուրքիան Մոսկվայում միջոցառումներին կմասնակցի դեսպանի կամ ժամանակավոր հավատարմատարի մակարդակով:

Էրդողանը նաև անուղղակիորեն քննադատել է իր նախորդին` Աբդուլլահ Գյուլին, ասելով. «Տարբեր քայլեր ձեռնարկվեցին սրանից առաջ: Գնացին Երևան, դիտեցին ֆուտբոլ: Սրանք ջերմ, հարաբերությունները փափկեցնող մեսիջներ թվացին, սակայն ամրացրին Երևանի ձեռքը, ինչից հետո մեզ վրա ավելի կոպտորեն սկսեցին ազդել»:

Կրկնելով Հայոց ցեղասպանության թեմային Թուրքիայի վերաբերմունքի մասին՝ Էրդողանն ասել է. «Ես իմ վերաբերմունքը պարզ ցուցադրեցի: Իսկ մենք Պուտինին էլ, մյուս ղեկավարներն էլ ասացինք՝ մենք բարդույթներ չունենք, պատրաստ ենք նաև բացել մեր ռազմական արխիվները, թաքցնելու ոչինչ չկա»: