Տիգրան Ուրիխանյանը խիստ նեղսրտել է` հայ-ռուսական բարեկամական խմբի մեջ չեն ներառել

Այսօր ԱԺ հերթական քառօրյա նիստն է:

Օրակարգին անցնելուց առաջ ԱԺ նախագահ Գալուստ Սահակյանին հարց ուղղեց ԱԺ ԲՀԿ խմբակցության պատգամավոր Տիգրան Ուրիխանյանը՝ դժգոհելով, որ իրեն չեն ներառել հայ-ռուսական պատգամավորական բարեկամության խմբում:

Գալուստ Սահակյանը պատասխանեց, որ ով դիմել է, նրան ներառել են, և ներառել են այն պատգամավորներին, ովքեր լավ նախապատրաստված են:

Պատգամավորն էլ արձագանքեց, որ ինքը դիմել է, սակայն պատասխան չի ստացել,  մինչդեռ ինքը նախկինում շատ լավ է աշխատել այդ խմբում, կարևոր հարցեր է բարձրացրել: «Այսուհետ ես դուրս եմ գալիս բոլոր պատվիրակությունների կազմերից, որովհետև խտրական վերաբերմունք է դրսևորվում իմ հանդեպ»,- ասաց Տիգրան Ուրիխանյանը:

Գալուստ Սահակյանը արձագանքեց. «Խորհուրդ չեմ տա, որ դուրս գաք: Սփոփիչ նայեք խնդրին: Մեր բյուջեն սահմանափակ է, այսուհետ, եթե կանխավ դիմեք, կարծում եմ, որ կգնաք»: