Պուտինին ասացի՝ լարվածություն պետք չէ. Օբաման՝ Էրդողանին

Փարիզում ավարտվել է ԱՄՆ նախագահ Օբամայի և Թուրքիայի նախագահ Էրդողանի հանդիպումը: Այն տևել է մեկ ժամ:

Ըստ Reuters-ի՝ հանդիպումից հետո ԱՄՆ նախագահը հայտնել է, որ Էրդողանի հետ զրուցել են, թե ռուսական ինքնաթիռի խոցումից հետո Թուրքիան և Ռուսաստանն ինչպես են համագործակցելու:

Կրկնելով Թուրքիայի՝ իր օդային սահմանը պաշտպանելու իրավունքի վերաբերյալ իր հայտարարությունը՝ Օբաման ասել է. «Պուտինին ասացի, որ կարիք չկա լարվածությունը սրել: Եկեք այս հարցում միասին գործենք»:

Թուրքական AA-ն տեղեկացնում է, որ Էրդողանը Օբամայի հետ հանդիպումից հետո հայտնել է, որ զրուցել են ՌԴ-ի հետ զարգացումների մասին: «Մեր խնդիրն այս հարցին դիվանագիտական ինչ-որ լուծում տալն է, քանի որ տարածաշրջանում լարվածությունը մեզ էլ է հուզում»,- ասել է նա:

Օբամա-Էրդողան հանդիպանը մասնակցել են նաև Թուրքիայի ԱԳ նախարար Մևլութ Չավուշօղլուն, ԱԳ նախարարի խորհրդատու Ֆերիդուն Սինիրլիօղլուն, նախագահի գլխավոր քարտուղարի օգնական Իբրահիմ Քալընը և նախագահականի՝ արտաքին հարաբերությունների հարցերով գլխավոր խորհրդական Ահմեդ Յըլդըզը: