Բաքուն չի վերակենդանացնի Nabucco նախագիծը. Независимая газета-ի անդրադարձը

Nabucco նախագիծը Բաքվում օրակարգից հանվել է, իսկ դրան նոր շունչ հաղորդելը Ուկրաինայի զարգացումների ֆոնին իրական չի համարվում: Այսպես է Բաքուն արձագանքել արևմտյան մի շարք ԶԼՄ-ներում վերջերս հայտնված այն պնդումներին, թե ԱՄՆ-ի և Իրանի հարաբերությունների ջերմացման հեռանկարը կարող է նպաստել նախագծի արդիականացմանը. գրում է Независимая газета-ն:

Ըստ թերթի՝ որոշակի իրարանցում էր ապահովել նաև Իրանի նավթի հարցերով փոխնախարար Ալի Մաջեդիի հայտարարությունը, թե Թեհրանը պատրաստ է իրանական գազով ապահովել ԵՄ-ին: 

Ադրբեջանի նավթային հետազոտությունների կենտրոնի ղեկավար Իլհամ Շաբան, սակայն, կարծում է, որ իրանական կողմի մասնակցությամբ Nabucco-ին նոր շունչ հաղորդելը տեսանելի ապագայում իրական չէ:  Դրա ապացույցն այն է, որ Բաքուն որոշել է վերաձևավորել այդ նախագիծը TANAP  տրանսանատոլիական գազատարի, որը համարվում է Բաքվի ու Անկարայի նախաձեռնությունը:

 Nabucco-ն կոչված է, Ռուսաստանը շրջանցելով, գազ հասցնել Եվրոպա Ադրբեջանից ու Թուրքմենստանից: Նախագիծը 2013-ին փակվել էր տնտեսական  խնդիրների պատճառով:  Թերթը  կարծում է, որ արդեն 2018-ին Հարավային Եվրոպայի երկրներն ադրբեջանական գազ կստանան, եթե որևէ «ֆորս մաժոր» տեղի չունենա: 

Իլհամ Շաբանի խոսքով, սակայն, եվրոպական շուկայում ադրբեջանական գազը չի մրցի ռուսականի հետ: