Էլեկտրաէներգիայի թանկացման դեմ բողոքող քաղաքացիները հրավիրվում են Ազատության հրապարակ

Այսօր ՀԾԿՀ շենքի դիմաց` Սարյան փողոցում, էլեկտրաէներգիայի սակագնի բարձրացման դեմ բողոքող երիտասարդները հաղորդագրություն են տարածել, որով կոչ են անում  ՀՀ բոլոր քաղաքացիներին` այսօր` ժամը 20:00-ին, հավաքվել Ազատության հրապարակում` հանրային քննարկում անցկացնելու համար:

Yerkir.am-ի հետ զրույցում բողոքող քաղաքացիներից մեկը` Արտաշես Արաբաջյանը, նշեց, որ հանրային քննարկումը հրավիրվում է այսօրվա դեպքերի կապակցությամբ, երբ ոստիկանությունը, ուժ կիրառելով, փորձեց ճնշել մի քանի տասնյակ քաղաքացիների արդարացի բողոքը` ուղղված էլեկտրաէներգիայի թանկացման դեմ: Նշենք, որ ոստիկանությունը խափանել էր քաղաքացիների բողոքի ակցիան 27 հոգու բերման ենթարկելու միջոցով: Իսկ ՀԾԿՀ-ն մտադիր է մինչև հուլիսի 1-ը, այսինքն` մեկ շաբաթից կայացնել էլեկտրաէներգիայի թանկացման որոշումը:

Արտաշես Արաբաջյանը նշեց, որ հավաքվում են` ի մի բերելու ստեղծված իրավիճակը և որոշելու, թե ինչ քայլեր են ձեռնարկելու հետագայում: