ԲՀԿ-ն պայքարելու է էլեկտրաէներգիայի թանկացման դեմ

Այսօր խորհրդարանական ճեպազրույցների ժամանակ ԱԺ ԲՀԿ խմբակցությունը ներկայացրեց իր դիրքորոշումը կառավարության երկու նախագծերի` շրջանառության հարկի նվազեցման և ընտանեկան բիզնեսին հարկային արտոնություններ տրամադրելու վերաբերյալ: Նաիրա Զոհրաբյանը նշեց, որ ավելի վաղ ԲՀԿ-ն հանդես է եկել նմանատիպ առաջարկություններով, սակայն Տիգրան Սարգսյանի կառավարությունը իմպերատիվ կերպով մերժել է այդ առաջարկությունները:

«Մենք, իհարկե, կողմ կլինենք այդ նախագծերին»,- ասաց ԲՀԿ խմբակցության պատգամավոր Միքայել Մելքումյանը: Նա նաև նշեց, որ ԲՀԿ-ն դեմ է էլեկտրաէներգիայի սակագնի բարձրացմանը: Պատգամավորն ասաց, որ, ԲՀԿ-ի մոտեցմամբ, տնտեսվարող սուբյեկտների, ատոմակայանների, Երևանի և Հրազդանի ՋԷԿ-երի բիզնես ռիսկերը չեն կարող բաշխվել սպառողների վրա:

«Եթե ՀԷՑ-ը ոչ արդյունավետ աշխատանքի կամ այլ ռիսկերի պատճառով ճեղքվածք ունի, դա չի կարող փակվել սպառողների հաշվին: Մենք պայքարելու ենք այդ թանկացումների դեմ»,- ասաց Միքայել Մելքումյանը` հավելելով, որ էլեկտրաէներգիայի թանկացումը շղթայական ձևով  կհանգեցնի ավելի մեծ թանկացումների, արդյունքում` աղքատության մակարդակը կբարձրանա, իսկ  հանրային դժգոհությունները կաճեն:

Նաիրա Զոհրաբյանը հավելեց, որ ԲՀԿ-ի համար հիմնավոր չեն եղել Հանրային ծառայությունները կարգավորող հանձնաժողովի նախագահ Ռոբերտ  Նազարյանի պարզաբանումները` սակագնի բարձրացման հետ կապված, ավելին` նա չի բացառել, որ դա նաև ոլորտի կազմակերպությունների վատ մենեջմենթի արդյունք է:

«Աբսուրդ է, որ այդ կազմակերպությունների վատ մենեջմենթի հետևանքների համար պետք է վճարի ՀՀ քաղաքացին, և մենք կգործադրենք բոլոր ջանքերը` օգոստոսի 1-ից էլեկտրաէներգիայի թանկացումը կանխելու համար»,- ասաց պատգամավորը: