Հարավային Կովկասը սպասում է Քերիի այցին. Независимая газета

«ԱՄՆ պետքարտուղար Ջոն Քերին մոտ ապագայում կայցելի Ադրբեջան: Այս մասին հայտնում է Вестник Кавказа-ն` չնշելով, սակայն, այցի ամսաթիվը։ Վրացական աղբյուրները նույնպես հայտնում են Քերիի այցի մասին` կրկին առանց ամսաթիվ նշելու։ Կդառնա՞ Քերիի այցը տարածաշրջանային,  կայցելի՞ նա նաև Հայաստան, դեռևս հայտնի չէ»,-  գրում է Независимая газета-ն։

Ըստ պարբերականի` ամերիկյան կողմը ուկրաինական ճգնաժամից հետո մեծ ակտիվություն է ցուցաբերում հետխորհրդային տարածքում։ Պետդեպարտամենտի ներկայացուցիչ Վիկտորյա Նուլանդն օրերս այցելել է Մոլդովա, նրա գործընկեր Նիշա Դեսայի Նիսվալը՝ Ղազախստան և Ղրղզստան։ Այժմ էլ նախատեսված են Քերիի այցերը:

«Դիվանագիտական լեզվից փոխադրած սա նշանակում է, որ Վաշինգտոնը, նախևառաջ, ուսումնասիրում է իրավիճակն այդ երկրներում` հնարավոր ապակայունացման տեսանկյունից, և քայլեր ձեռնարկում Ռուսաստանի ազդեցության ուժեղացմանը դիմադրելու համար»,- գրում է թերթը։

Ըստ պարբերականի` «Հարավային Կովկաս» քաղաքագետների ակումբի ղեկավար Իլգար Վելիզադեն, մեկնաբանելով Քերիի այցը Բաքու, ասել է, որ այցի ընթացքում կշոշափվի նաև ԼՂ հիմնախնդիրը։

Թերթը նաև նշում է, որ Բաքվում Քերին հնարավոր է շոշափի Ադրբեջան-Թուրքիա ռազմական ալյանսի հարցը: Թերթը հիշեցնում է, որ նախօրեին ադրբեջանական Haqqin.az տեղեկացրել էր, որ Ադրբեջանը և Թուրքիան նոր, մասշտաբային ռազմական համաձայնագիր են նախապատրաստում, որի շրջանակում կողմերը պարտավորվում են միմյանց ռազմական օգնություն ցուցաբերել, եթե երկրներից մեկը դիմի մյուսին։