Էրդողանը Բաքվում կհայտարարի ռազմավարական համագործակցության նոր փուլի մասին. Независимая газета

Թուրքիայի նոր նախագահ Ռեջեփ Թայիփ Էրդողանի առաջին այցն այդ պաշտոնում կլինի Բաքու:  Օրակարգում են նաև երկկողմ հարաբերությունների, տարածաշրջանային զարգացումների, էներգետիկայի ոլորտում համագործակցության հարցեր, չի շրջանցվի նաև  հայ-ադրբեջանական հակամարտության կարգավորման  խնդիրը. գրում է Независимая газета-ն՝ անդրադառնալով Թուրքիայի նախագահի՝ Բաքու կատարելիք այցին:

Թերթը նշում է, որ սա Էրդողանի առաջին այցը չէ Ադրբեջան, սակայն հենց Բաքուն ու Անկարան այս այցը համարում են ռազմավարական համագործակցության նոր փուլի սկիզբ:

Հայտնի է նաև, որ Էրդողանը կմասնակցի «Շահ Դենիզ» գազատարի շինարարության հիմնարկեքին, որով ապագայում Ադրբեջանից Թուրքիա և Եվրոպա կմատակարարվի բնական գազ:

Նախագահի պաշտոնում Էրդողանի առաջին այցն արվում է հենց Ադրբեջան, ինչպես ժամանակին Ալիևի առաջին այցն էր կատարվել Թուրքիա: Սա, ըստ աղբյուրի, հարաբերությունների բնույթի ցուցիչ է:

Թերթը, վկայակոչելով  ադրբեջանական պարբերականների կարծիքները, նշում է, որ եթե նախկինում Թուրքիան Ադրբեջանի համար արևմտյան աշխարհի հետ կապող կամուրջ էր,  ապա այսօր Ադրբեջանն էլ դեր ունի միջազգային քաղաքականության մեջ և կարող է անհրաժեշտ պահի սատար լինել Թուրքիային: 

«Միայն ժամանակը ցույց կտա, թե որքանով կարդարանան Էրդողանի՝ Ադրբեջան կատարած առաջին այցից ակնկալիքները»,- եզրափակում է թերթը: