Անհանգիստ Երևանը. Независимая газета-ն՝ հունվարի 18-ի հանրահավաքի մասին

«Երևանում  սկսվել են բողոքի ցույցերը՝ ուղղված հունվարի 1-ին ուժի մեջ մտած կենսաթոշակային բարեփոխումների դեմ: «Դեմ եմ» նախաձեռնության բողոքի ցույցին շաբաթ օրը մասնակցել է մոտ 10 հազար մարդ», - գրում է Независимая газета-ն՝ անդրադառնալով հունվարի 18-ի ցույցերին:

Թերթը նշում է, որ  Երևանի համար անսովոր` - 10 աստիճան ցուրտը չէր վախեցրել հազարավոր մարդկանց, ովքեր եկել էին Ազատության հրապարակ՝ իրենց իրավունքների համար պայքարելու:

Այնուհետեւ հոդվածագիրը մեջբերում է  հրապարկում ելույթ ունեցած ընդդիմադիր գործիչների խոսքերը, մասնավորապես` ՀԱԿ անդամ Լևոն Զուրաբյանի և ԲՀԿ-ից Նաիրա Զոհրաբյանի, ովքեր կարծում են, որ այդ օրենքը սպասարկում է իշխանական կլանի շահերը:

Թերթը նշում է նաև, որ  վերլուծաբան Բորիս Նավասարդյանը չի բացառել, որ ընդդիմադիր ուժերը ինչ-որ փուլում հնարավոր է կարողանան միավորվել և վտանգ ներկայացնել իշխանության համար: 

«Թե ինչով կավարտվի հայ հասարակության բողոքն իշխանությունների դեմ, հայտնի կդառնա հունվարի 25-ին, երբ ՍԴ-ն կդիտարկի կուտակային կենսաթոշակների մասին օրենքի կասեցման հարցը: Վճիռը  կհրապարակվի մարտի 28-ին: Ցուցարարների խոսքերով՝ եթե դատարանն օրենքը գործող թողնի, ապա ներքաղաքական լարվածությունը Հայաստանում անդառնալի բնույթ կկրի»,- եզրափակում է թերթը։