Մինչեւ Մոսկվա գնալը մեր եվրոպացի գործընկերները տեղյակ են եղել. Շավարշ Քոչարյան

Կառավարության նիստի ավարտին մի քանի լրագրողների հետ զրույցում փոխարտգործնախարար Շավարշ Քոչարյանը մեկնաբանեց օրեր առաջ արած իր այն հայտարարությունը, որ, մտնելով Մաքսային միություն, Հայաստանը կկորցնի իր ինքնիշխանությունը:

«Ես այդպիսի բան չեմ ասել: Խնդիրը վերաբերում է նրան, որ Մաքսային միության անդամ դառնալը նշանակում է ինչ-որ աստիճանի ինքնուրույն որոշումների, սուվերենության պակաս: Դա ցանկացած մաքսային միության է վերաբերում»,- հայտարարեց նա:

Խոսելով Ասոցացման համաձանյագրի ստորագրման մասին` Քոչարյանն ընդգծեց, որ հիմա պետք է եվրոպական գործընկերների հետ բանակցություններով շարունակեն հասկանալ` որքանով է Մաքսային միությունը վտանգում համաձայնագրի ստորագրմանը, կամ` չի վտանգում:

«Համենայն դեպս, մենք պատրաստ ենք գնալ Ասոցացման համաձայնագրի ստորագրմանը: Այդ պայմանագիրը մեզ համար շատ կարեւոր է, քանի որ շատ լուրջ աշխատանք է կատարվել այդ ուղությամբ, լուրջ նվաճումներ կան»,- հայտարարեց Քոչարյանը:

Ուշագրավ է, որ փոխարտգործնախարարը վստահեցրեց նաեւ, որ եվրոպական կողմը Սերժ Սարգսյանի հայտարարությունից անակնկալի չի եկել: «Մինչ Մոսկվա գնալը մեր եվրոպացի գործընկերներն արդեն տեղեկացված են եղել, որ հնարավոր է այդպիսի արդյունք: Այնպես որ` դա անկանկալ չէր»,- ասաց նա:

Հարցին, թե` հիմա Եվրոպայի հետ մենք խնդիրներ կունենա՞նք, Քոչարյանը պատասխանեց, որ համագործակցությունը շարունակվելու է նույն ձեւով, բացառությամբ մեկ տարբերության: «Տարբերությունը հետեւյալն է` Խոր եւ համապարփակ առեւտրի գոտու պայմանագիրն արդեն դառնում է անհամատեղելի Մաքսային միության անդամակցության հետ: Այդ երկուսն իրար հետ հնարավոր չէ համատեղել»,-հայտարարեց նա: