Մենք ունենք մեսիջ, որ այլ պետություններ ևս կբարձրացնեն դրույքաչափերը, ինչը կազդի մեր քաղաքացիների վրա. Շավարշ Քոչարյան

ԱԺ տնտեսական հարցերի մշտական հանձնաժողովում քննարկվում է «Պետական տուրքի մասին» ՀՀ օրենքում լրացում կատարելու մասին նախագիծը:

Կառավարությունն առաջարկում է փոփոխել օրենքի 14.3 հոդվածը և շարադրել հետևյալ կերպ. «Փոխադարձության հիման վրա՝ օտարերկրյա պետության քաղաքացիների համար Հայաստանի Հանրապետության Կառավարության կողմից, օրենքով սահմանված դրույքաչափերի շրջանակներում, կարող են սահմանվել պետական տուրքի այլ դրույքաչափեր»:

ԱԳ փոխնախարար Շավարշ Քոչարյանը փոփոխության անհրաժեշտությունը բացատրեց նրանով, որ կարող է լինել իրավիճակ, երբ մեզ մոտ դիրույքաչափն ավելի բարձր է, քան այդ երկրներում: «Մենք ունենք մեսիջ, որ այլ պետություններ ևս կբարձրացնեն դրույքաչափերը, ինչը կազդի մեր քաղաքացիների վրա»,- ասաց նա:

Հանձնաժողովը, ընդհանուր առմամբ, դեմ չէր առաջարկվող փոփոխությանը, սակայն հանձնաժողովի նախագահ Խոսրով Հարությունյանը նշեց, որ խնդիր կա: «Մինչև վերջերս գործում էր իրավական ակտերի մասին օրենքը, որում ասվում էր` բացառապես օրենքով է կարգավորվում հարկերի, տուրքերի չափը, հետևաբար` այդ դրույթը փոխանցել կառավարությանը՝ հակասում է այս օրենքին»,- բացատրեց նա:

Հարությունյանը միևնույն ժամանակ վկայակոչեց Սահմանադրության 60-րդ հոդվածի 8-րդ կետը և նշեց, որ կառաջնորդվեն Սահմանադրության այդ հոդվածով: «Այդտեղ ամրագրված է, որ յուրաքանչյուր ոք պարտավոր է մուծել օրենքի համապատասխան հարկեր, տուրքեր, բայց չափի մասին Սահմանադրությունը չի ասում: Քանի որ ունենք նախադեպ` օրենքով սահմանված կարգով, օրինակ` համայնքի համար սահմանել տեղական տուրքի սեփական դրույքաչափ՝ առաջնորդվելով Սահմանադրության հենց այդ հոդվածով, ապա կարող ենք պետական տուրքերի սահմանման իրավաչափությունը տրամադրել կառավարությանը»,- նշեց նա:

Շավարշ Քոչարյանը համաձայնեց: Հարությունյանը նաև նշեց, որ հիմնական ձևակերպման մեջ պետք է գրվեր հետևյալը՝ առավելագույն դրույքաչափը չգերազանցող դրույքաչափեր:

Նշենք որ կառավարության առաջարկում ասվում էր. «Նախագծի ընդունման արդյունքում կապահովվի Հայաստանի Հանրապետության և օտարերկրյա պետությունների միջև միմյանց քաղաքացիներից գանձվող պետական տուրքերի առնչությամբ փոխադարձության կիրառման պայմանավորվածության և նպատակահարմարության դեպքում Հայաստանի Հանրապետության Կառավարության կողմից պետական տուրքի՝ օրենքով սահմանված դրույքաչափերի շրջանակներում այլ դրույքաչափի սահմանման հնարավորությունը»:

Փոխարտգործնախարարն ասաց, որ սկզբունքորեն դեմ չէ, բայց գուցե անհրաժեշտ է մի անգամ էլ նայել:

«Վաղուց պետք է նայած լինեիք, պարո'ն Քոչարյան: Առաջարկում եմ այս առաջարկություններով դնել քվեարկության: Երեկ երեկոյան համաձայնեցրել ենք ԱԳ նախարարի հետ»,- հակադարձեց Հարությունյանը:

Հարցը միաձայն դրական կարծիքով կներկայացվի առաջիկա քառօրյային: