Եվրոպացի գործընկերները փշաքաղեցրել են Ծառուկյանին՝ խոստանալով 15 միլիարդի ներդրում անել

Հայտնել ենք, որ այսօր Մարզահամերգային համալիրում կայացավ «Ծառուկյան» դաշինքի քարոզարշավի ամփոփիչ միջոցառումը, որի ընթացքում ելույթ ունեցավ դաշինքի ղեկավար Գագիկ Ծառուկյանը: Նա նշեց, որ Եվրոպաական խորհրդարանի պատգամավորները, գալով Հայաստան, տեսել են ժողովրդի անվերապահ հավատն ու նվիրվածությունը Ծառուկյան անձի նկատմամբ, ապա հայտնեց, որ նույն այդ գործընկերները խոստացել են լուրջ ներդրումներ անել Հայաստանի համար, եթե ապրիլի 2-ին կայանալիք ընտրություններում «Ծառուկյան» դաշինքը հաղթի:

«Իրոք, շատ հիացած ողջունեցին ինձ, իմ թիմին՝ մեր ծրագրի՝ այդ հայրենասիրական ծրագրի համար և, տեսնելով ժողովրդի անվերապահ վստահությունը, հիացած գնացին ու ասեցին, որ մեզ հետ են, մեր կողքին են: Ես կարող եմ  մի լուր էլ ձեզ ասել, որ, իրոք, ես փշաքաղվել եմ. իմ գործընկերները, տեսնելով այս անվերապահ վստահությունը և այս ծանրության տակ մտնելը, տեսնելով, որ մենք հաղթելու ենք, ուրիշ ճանապարհ չկա, և իմ գործընկերները այս հինգ օրվա մեջ զանգահարելով, այն ժամանակ, որ ես դեռ չեմ դիմել իրենց, այլ իրենք ասել են, որ` պարո'ն Ծառուկյան, պատրաստ են 15 միլիարդ դոլար ներդրում կատարել մեր երկրում»,- ասաց Ծառուկյանը՝ հավելելով. «Ես ձեզ ասեմ, որ, իրոք, փշաքաղվել եմ, դա գալիս ա մարդու պահվածքից, ապրածից, որ դեռ չեմ դիմել, բայց որ դիմեմ, շատ ու շատ ընկերներ ունեմ աշխարհով մեկ, բայց դա գալիս ա իմ պահվածքից, իմ հզորությունից»:

Նա նաև հիշեց, որ նախընտրական քարոզարշավի ընթացքում եղել են Հայաստանի գրեթե բոլոր գյուղերում և քաղաքներում, ներկայացրել իրենց ծրագրի 15 կետերն ու ժողովրդի անվերապահ աջակցությունը ստացել: «Քարից էլ լինես, չես կարող դիմանալ՝ մտածելով, որ մարդիկ անդունդի եզրին են կանգնած, կապ չունի՝ սահմանամերձ գյուղում, թե՝ քաղաքում, բոլորը խնդիրներ ունեն, դրանց լուծում է պետք»,- հայտարարեց Ծառուկյանը՝ հավելելով, որ իրենք թշնամի չունեն, բայց նախանձողներ շատ ունեն: