Մոսկվա գնալը ճիշտ էր. Հովիկ Աբրահամյան

Այսօր` ՀՀ գիտությունների ազգային ակադեմիայի տարեկան ընդհանուր ժողովին մասնակցելուց հետո, վարչապետ Հովիկ Աբրահամյանը պատասխանեց լրագրողների մի քանի հարցերի: Մասնավորապես` հարցին, թե արդյո՞ք ճիշտ էր Երևանից Մոսկվա տեղափոխված` ԵՏՄ միջկառավարական նիստին մասնակցելու որոշումը, պատասխանեց. «Երկրի վարչապետը չպետք է զգացմունքներով որոշում կայացնի, պետք է մտածենք` մեր պետության շահերից ելնելով»:

Հովիկ Աբրահամյանի խոսքով` ՌԴ վարչապետ Դմիտրի Մեդվեդևը Հայաստան այցի ժամանակ խնդրել էր իրեն, որ մասնակցի այդ նիստին: «Ես, իհարկե, կարող էի չմասնակցել ու հաճոյանալ ժողովրդի այն հատվածին, որն ասում էր՝ մի' գնացեք, մի' մասնակցեք, բայց կարծում եմ՝ գնալը շատ ճիշտ էր ու արդյունավետ: Մենք պետք է ամրապնդենք մեր դաշնակից պետությունների հետ հարաբերությունները: Գնալը շատ արդյունավետ էր, և մեր դաշնակցի՝ ՌԴ-ի հետ մեր հարաբերությունները պետք է ամրապնդենք»,- ասաց վարչապետը` հավելելով, որ  մայիսի 20-ին ԵԱՏՄ վարչապետերի խորհրդի նիստն անցկացվելու է Երևանում: