Քաղաքական կատականի

Ինա-կուրացիա՝ համեստի մեջ

Երեխային գործի դիր ու հետևից գնա: Այս պարզ ճշմարտության գիտակցումով էլ Երևանի ավագանու ընտրությունների ՀՀԿ շտաբի պետ Էդուարդ Շարմազանովին կուրացիայի տակ են վերցրել Հովիկ Աբրահամյանն ու Տիգրան Սարգսյանը: ԱԺ նախագահն ու վարչապետը, սակայն, այս ֆրոնտում ևս չեն կարողանում համաձայնության գալ, թե իրենցից ով է առաջինը: Չժխտելով Տիգրան Սարգսյանի մեծ ներդրումն այս գործում՝ Հովիկ Աբրահամյանն, այնուամենայնիվ, նշել է, որ Շարմազանովի առաջին կուրատորն ինքն է:

Սերգո' ջան, դու լավ չես ապրելու...

«Մեր ազգը վատ է ապրելու, քանի դեռ իր սրտով իշխանություն չի ձևավորել»,- ասել է Ազգային անվտանգության խորհրդի քարտուղար Արթուր Բաղդասարյանը:

Փառքդ շատ, տեր Աստված, այս հասարակ բանը նաև իշխանության ներկայացուցիչների ուղեղին է հասել:

Մշակույթի տուն

Եթե Սերժը երդվի, Րաֆֆին նրան իր հետ դժոխք կտանի: Իսկ եթե Րաֆֆին երդվի՞: ՀՀԿ աղբյուրները նշում են, որ այդ պարագայում Սերժն իր հետ նաև Րաֆֆուն դրախտ կտանի, որովհետև ՀՀԿ-ն դժոխքի մշակույթ չունի:

Չէ, չէ մի՝ 90 տոկոս

Հայտնի սոցիոլոգ Ահարոն Ադիբեկյանն իր գաղտնի ասուլիսներից մեկի ժամանակ հայտարարել է, որ, վերջերս անցկացրած հարցման համաձայն, ՀՀ քաղաքացիների 90 տոկոսն իր ձայնը կտա ՀՀԿ-ին, եթե առաջիկա կիրակի հանրաքվե անցկացվի «Ում կուզեիք տեսնել դժոխքում» թեմայով:

Կերակուր

Որոշ աղբյուրների համաձայն` առյուծի վանդակում կհայտնվեն այն ԲՀԿ-ականները, ովքեր կփորձեն մասնակցել Րաֆֆի Հովհաննիսյանի երդմնակալության արարողությանն ու երթին: Գրեթե կասկած չկա, որ այս հրահանգի հետևից երևում են Գագիկ Ծառուկյանի ականջները:

Քանի՞ գլուխ ունի, որ...

Ասում են՝ Հովիկ Աբրահամյանի հատուկ հրահանգով ՀՀԿ-ականներին արգելվել է ՀՀԿ ԳՄ նիստից ինֆորմացիա դուրս տալը: Շարմազանովին մոտ կանգնած աղբյուրների կարծիքով՝ դա ՀՀԿ խոսնակի իրավասությունների կոպիտ խախտում է: Իսկ Հովիկ Աբրահամյանին մոտ կանգնած աղբյուրը նշում է՝ ընդհակառակը, դա ԱԺ նախագահի և փոխնախագահի սուբորդինացիային առնչվող հարց է:

Էդիկ ԱՆԴՐԵԱՍՅԱՆ