Քաղաքական կատականի

Հարկավոր թռիչք

«Ինքը չի ասում, որ եթե ես ընտրվեմ, լուսին կթռնեմ` կանգնած տեղից»,- Սերժ Սարգսյանի նախընտրական համեստ խոստումների մասին ասել է ՀՀ նախագահի խորհրդական, ծանրամարտի աշխարհի նախկին չեմպիոն Յուրի Վարդանյանը: Հասկացանք, թող լուսին չթռնի, բայց գոնե բոյի չափ չթռնի՞, որ տեսնիՙ ուր կորավ հայ-թուրքական դիվանագիտության էն անտեր գնդակը:

Միջազգային

Երևանի քաղաքապետարանը, որպես շեֆին արվելիք հաճելի անակնկալ, դիմել է ՅՈՒՆԵՍԿՕ-ին` խնդրելով դեկտեմբերի 2-ը, մաքուր ջրի փոխարեն, այսուհետ հռչակել աներձագի միջազգային  օր:

Հարգալից բարգավաճում

«Գյումրիում ԱԺ ընտրությունների ժամանակ Շիրակի մարզը ցույց է տվել, թե ինչքան է հարգում ԲՀԿ-ին»,- հարցազրույցներից մեկում ասել է ԲՀԿ-ական պատգամավոր Մարտուն Գրիգորյանը: Շիրակում, փաստորեն, ԲՀԿ-ն հարգված է, ՀՀԿ-ն` զարկված:

Չեմ կրնա

Ազգային ժողովում ՀՀԿ-ական պատգամավոր Շուշան Պետրոսյանին կամաց-կամաց հասկացնում են, թե ինչի համար են իրեն բերել ԱԺ, բայց նա էլի շարունակում է իրեն չհասկացողի տեղ դնել: «Չեմ ու չեմ, չեմ կրնա երգե, մանդատիս ծանրութենեն չեմ կրնա երգե»,- գյումրեցի նախնիների հանգով արդարանում է պատգամավոր տիկինը:

Թարսի պես

Ասում են, երբ Շուշան Պետրոսյանին ԱԺ-ում առաջարկել են երգել, նրա մտքին լավ էլ եղել է մի կարգին ազգագրական երգ թնդացնել` հատկապես երաժշտական նվագակցության պարագայում, բայց թե, թարսի պես, այդ պահին նիստերի դահլիճում չի եղել Արտաշես Գեղամյանը:

Կոտրվածք

Ասում են, ՌԴ արտգործնախարար Սերգեյ Լավրովը Ստամբուլում կոտրել է ձեռքը: Ի՛նչ անենք, բա մեր ջանը քա՞ր է: Մեր Սերժն էլ կոտրել է սիրտը: Եղավ 3 տարի:

Լևոն Սարգսյան