Քաղաքական կատականի

Տակտիկա

Ասում են` թիվ 1 ընտրատարածքում ԱԺ պատգամավորի ՀՀԿ-ական թեկնածու Ռոբերտ Սարգսյանը, որ որոշել  է հավիտյանս հավիտենից ընտրողների աչքին չերևալ, նախընտրական իր քարոզարշավը կազմակերպել է` առաջնորդվելով աննկուն հանրապետական Վիկտոր Դալլաքյանի մշակած տակտիկայով, բայց վերջինիս կաստյում-շալվարի փոխարեն ընտրողներին է ուղարկել իր մեծադիր լուսանկարները:

Բախտ բաժանող

Չնայած այն բանին, որ ՀՀ նախագահի «ղուրբան» ասողներն ու նրա «ղուլիները» շատ են, բայց Սերժն այդպես էլ չի կարողանում դառնալ Գուրբանգուլի:

Նախ

«Ազատ դեմոկրատներ» կուսակցության փոխնախագահ, ՀՀ նախագահի թեկնածու Անուշ Սեդրակյանը վստահ է, որ Հայաստանում բան փոխելու համար «նախ պետք է փոխել քաղաքական սցենարը»: Ոչ, հարգելի Անուշ, նախ պետք է փոխել սցենարիստին:

Նմանություն

ՀՀԿ-ի վետերան Գալուստ Սահակյանը ցնցված է թիվ 1 ընտրատարածքում իրենց կուսակցության թեկնածու Ռոբերտ Սարգսյանի վարած նախընտրական պայքարի նորամուծությունից. վերջինիս դեռ ոչ մի ընտրող կենդանի վիճակում չի տեսել, փոխարենն ամենուր նրա լուսանկարներն են: Բայց բազմափորձ Գ. Սահակյանին ցնցել է Ռ. Սարգսյանի և նրա լուսանկարների ապշեցուցիչ նմանությունը. պարզվել է` երկուսն էլ բացարձակապես չեն խոսում:

Կանխավ

Լավատեղյակ աղբյուրների պնդմամբ` ՀՀԿ մամուլի քարտուղար Էդ. Շարմազանովը հերթական շշպռոցն է պատրաստել Իլհամ Ալիևի համար, թեև վերջինս նոր առիթ դեռևս չի տվել: Սակայն Շարմազանովը վստահ է, որ առաջիկա օրերին, ոնց էլ չլինի, հարևան երկրի նախագահը մի ախմախ բան ասելու է:

Լևոն Սարգսյան