Քաղաքական կատականի

Ավան-թավան

ՀՀԿ գործադիր մարմինն իր վերջին նիստում որոշել է նախագահական ընտրությունների քարոզարշավը սկսել Ավանով: ՀՀԿ-ին սատարող գողականներն էլ, բնականաբար, քարոզարշավը կսկսեն «թավանով»:

«Ի կրթութենե»

ՀՀԿ գործադիր մարմնի վերջին նիստում, ըստ լուրերի, երիտասարդ «մարմնականներին» նոր պարտականություններ են առաջադրվել` պայմանավորված նախագահական ընտրություններով: Էդուարդ Շարմազանովը, ասում են, արդեն պաշտոնապես է ստանձնել ՀՀԿ առաջին դիպուկահարի պարտականությունները (մինչ այդ պաշտոնակատար էր): Արմեն Աշոտյանի համար նույնպես պայքարի լայն ճակատ է բացվել. նա կշարունակի իրականացնել ՀՀԿ գլխավոր ֆեյսբուքահարի պարտականությունները: Բնականաբար, ջահել ՀՀԿ-ականներից անգործ չի մնա Կարեն Ավագյանը, նա «ի կրթութենե» կստանձնի ՀՀԿ գերագույն ֆելդշերի պաշտոնը: Մրցապայքար է` պայթյուն կա, բան կա:

Նազուկ ՀՀԿ

Քաջատեղյակ աղբյուրները հաղորդում են, որ Ազգային ժողովի ՀՀԿ խմբակցության պատգամավոր, ԵԽԽՎ հայաստանյան պատվիրակության ղեկավար Դավիթ Հարությունյանը փետրվարի 18-ի նախագահական ընտրությունների վերաբերյալ ԵԽԽՎ դիտորդական առաքելության մամուլի վերջին հաղորդագրությունից կոնտուզիա է ստացել:

Ստաժ

ՀՀ նախագահի թեկնածու Հրանտ Բագրատյանը, ասում են, հրաժարվել է օրինակարգ նախագահ Ս. Սարգսյանի մոտ պահակ աշխատելու մտադրությունից, փոխարենը` միջնորդել է, որ այդ պաշտոնը տան իր կոշիկի ձախ թային: Վարչապետ «աշխատած» կոշիկ է, պահակն ինչ է, որ չաշխատի:

Լևոն ՍԱՐԳՍՅԱՆ