ՀՀ օլիգարխը ոչ մի պետության օլիգարխների չափերի մեջ չի մտնում. Աշոտ Աղաբաբյան

Երեկ լրագրողների հետ զրույցում նախագահ Սերժ Սարգսյանը հայտարարել է, որ ԱԺ ՀՀԿ խմբակցությունում չկան օլիգարխներ, ինչը մեծ աղմուկ է բարձրացրել:

Այսօր ԱԺ-ում լրագրողները փորձեցին ԱԺ ՀՀԿ խմբակցության պատգամավոր Աշոտ Աղաբաբյանից պարզել, թե, իրո՞ք, իր պատգամավոր գործընկերների շրջանում օլիգարխներ չկան: ՀՀԿ-ական պատգամավորը նախ հստակեցրեց, թե ինչ են լրագրողները հասկանում օլիգարխ ասելով, հետո հայտարարեց, որ յուրաքանչյուր երկրում էլ օլիգարխ կա, իսկ հետո տվեց օլիգարխի սահմանումը: «Որեւէ մեկին  մեր նման փոքր պետություններում օլիգարխ չեն համարում, որովհետեւ եթե ըստ չափերի էլ վերցնենք, ՀՀ օլիգարխը ոչ մի պետության օլիգարխների չափերի մեջ չի մտնում»,- հայտարարեց նա` հավելելով, որ մեր երկրում, այդուհանդերձ, օլիգարխներ կան:

Լրագրողների դիտարկմանն ի պատասխան, որ օլիգարխներ կան ՀՀԿ ցուցակում, ՀՀԿ-ական պատգամավորը տարուբերեց գլուխը,ոչ, «ոչ» ասաց, ոչ էլ` այո: «Ես ուզում եմ օլիգարխին գործարարից անջատեք: Գործարարներն ընդամենը ունեն ունացվածք, որեւիցե արտադրություն, որով կարողանում են պահել իրենց տունը: Իմ կարծիքով` օլիգարխի եւ գործարարի միջեւ կա մեծ անջրպետ, որովհետեւ օլիգարխը նաեւ ունի լուրջ կարողություն դրսում»,- հայտարարեց Աղաբաբյանը:

Դիտարկմանը, թե, այդուհանդերձ, ԱԺ-ում կա՞ն օլիգարխներ, ՀՀԿ-ական պատգամավորը պատասխանեց, որ պետք է ԱԱԾ-ին հարցնել, թե ով դրսում ինչ ունի, ինքը՝ չգիտի: