Քաղաքական կատականի

Նախագահի պաշտոնի տարփածուն

Դրածոն նայում է պահածոյի փակ տուփին ու խորհում. «Քեզ ի՞նչ կա, ինձ արդեն բացել են...»:

Հեյ գիտի ժամանակներ

Երեկ «Երկրի հարցը» ծրագրի հյուրն էր Պարույր Հայրիկյանը: Շատ չանցած՝ հաղորդավարն ու հյուրը մտքով տեղափոխվեցին այն հրաշալի օրերը, երբ Պարույրը փրկարար էր աշխատում հայ ժողովրդի մոտ:

Ազատ, բայց դեմոկրատ

Խաչատուր Քոքոբելյանը ազատ է սատարման խնդիրներում, բայց դեմոկրատ՝ ընտրության հարցում: Նա չի սատարելու ոչ մեկին, բայց ընտրելու է Բագրատյանին:

Աշոտյա'ն, դու դեպք ես

ՀՀ ԿԳ նախարար Աշոտյանն իր ֆեյսբուքյան մի գրառումով Րաֆֆի Հովհաննիսյանին ասուլիսի թեմա էր տվել, որպեսզի վերջինս գոնե մեկ օրով հանգիստ թողնի խանութպաններին ու վարսավիրներին:

Auto bus

Ադիբեկյանի տվյալներով՝ ընտրելու իրավունք ունեցող ՀՀ քաղաքացիների 80 տոկոսից ավելին պատրաստվում է գնալ ընտրությունների: Այդ կապակցությամբ ՀՀԿ շտաբը կարգի է բերում հանրապետության ավտոբուսային պարկը, իսկ Տարոն Մարգարյանին էլ հանձնարարել է չինական ավտոբուսների նոր խմբաքանակ ներկրել Երևան:

Բազմատեղակալը

Երբ Գալուստ Սահակյանը Yerkir.am-ին ներկայացրել էր ՀՀԿ շտաբի պետի հինգ տեղակալների պարտականությունները, խոհեմաբար լռել էր այն մասին, թե ինչով է զբաղվելու այդքան տեղակալ ունեցող Հովիկ Աբրահամյանը: Հիմա, երբ հաճախացել են երևելի ԲՀԿ-ականների այցելությունները ՀՀԿ շտաբ, հասկանալի է դառնում, որ շտաբի պետ Հովիկ Աբրահամյանը` ի դեմս Հովիկ Աբրահամյանի, ունի ևս մեկ տեղակալ՝ ԲՀԿ-ի հետ տարվող աշխատանքների գծով:

Դիտորդական

Նախագահական ընտրությունների կապակցությամբ Հայաստան ժամանած միջազգային դիտորդներն արձանագրել են, որ ՀՀ-ում ընտրելու իրավունք ունեցող քաղաքացիների թիվը մի քիչ է ավելի երկրի ազգաբնակչության ընդհանուր թվից: Նրանց կարծիքով, սակայն, դա որևէ կերպ չի ազդի հետնապահների արդյունքների վրա: Նրանցից, օրինակ, Արման Մելիքյանը, միևնույն է, տանելու է այնքան ձայն, որքան տանելու է:

Էդիկ ԱՆԴՐԵԱՍՅԱՆ