կարևոր
1603 դիտում, 2 ամիս առաջ - 2022-11-30 22:54
Հասարակություն

«Հայրենադարձության» պատրանքը և իրական վիճակագրությունը (զուգահեռ իրականություն. մաս 30)

«Հայրենադարձության» պատրանքը և իրական վիճակագրությունը (զուգահեռ իրականություն. մաս 30)

4 տարի է` որոշակի շրջանակներ պնդում են, թե Հայաստանում զանգվածային հայրենադարձություն է, արտագաղթ չկա, իսկ վերջին ամիսներին իբրև թե հարյուր հազարավոր ռուսներ են հաստատվել ՀՀ-ում։ Այսօր Ռուսաստանի Դաշնության պետական վիճակագրության դաշնային ծառայությունը (Росстат) հրապարակել է այս տարվա հունվար-սեպտեմբերին ՌԴ սոցիալ-տնտեսական դրության ցուցանիշները, այդ թվում` ՀՀ-ՌԴ միգրացիոն հաշվեկշիռը։ Ըստ այդմ` 2022 թ. հունվար-սեպտեմբերին հաշվեկշիռը ՌԴ համար -14410 է, այսինքն` այդքան մարդ կամ մնացել է ՀՀ-ում, կամ էլ ՀՀ միջոցով երրորդ երկիր է տեղափոխվել։ Ի դեպ, Վրաստանի դեպքում ցուցանիշն այնքան է նվազել, որ ընդամենը -616 է, իսկ Ղազախստանում` -9515, որոնք համահունչ են այդ պետությունների հրապարակած տվյալների հետ։ ՀՀ-ում ևս նվազում է նկատվում. 2022 թ. հունվար-հուլիսին հաշվեկշիռը -16530 էր, հետևաբար օգոստոս-սեպտեմբերին նկատվել է ՀՀ-ում ռուսաստանցիների` 2120-ով նվազում։ Բացի այդ` ՀՀ ժամանածների մեջ մեթոդապես դժվար է հստակ հաշվարկել, թե քանիսն են ՌԴ քաղաքացիությամբ մեր հայրենակիցները, քանիսը` այլազգիները։ Այս ներհոսքից ոգևորված մարդկանց համար համբերատարությամբ մանրամասնորեն առանձնացրել եմ տարբեր տարիների (այն տարվանից, երբ համապատասխան վիճակագրությունը կանոնավոր հրապարակվում ու հետո լրամշակվում է) Ռոսստատի վիճակագրությունը` ՌԴ համար հաշվեկշռով։ Ըստ այդմ` 2003 թվից այս կողմ ՀՀ համար ամենավատ ցուցանիշները 2019 և 2021 թթ. են։

Ստորև ներկայացնում եմ 2003-2021 թթ. բոլոր տարիների տվյալները.

2003 թ.` +4026

2004 թ.` +2403

2005 թ.` +6961

2006 թ.` +12263

2007 թ.` +30023

2008 թ.` +34184

2009 թ.` +34770

2010 թ.` +19192

2011 թ.` +31791

2012 թ.` +31998

2013 թ.` +32294

2014 թ.` +24006

2015 թ.` +20533

2016 թ.` +11993

2017 թ.` +13999

2018 թ.` +14358

2019 թ.` +35549

2020 թ.` -1844

2021 թ.` +45234

2022 թ. հունվար-սեպտեմբեր` -14410։

Այսպիսով` 2003-2021 թթ. հաշվեկշիռը կազմում է +403733 ՌԴ համար, հետևաբար ոգևորվելու առիթ չունենք, մանավանդ որ ՀՀ վիճակագրական կոմիտեի տվյալների համաձայն ՀՀ փաստաթղթերով սահմանային մուտքերի և ելքերի հաշվեկշիռը բացասական է ՀՀ համար։

#զուգահեռ_իրականություն

Միքայել Մալխասյան

Պատմական ժողովրդագրության մասնագետ,

պ.գ.թ., դոցենտ