Տնտեսագիտական համալսարանն եմ ավարտել․ Չեխովի դպրոցի տնօրենի ժպ-ն՝ ծնողներին

Լրագրողների հետ զրույցում դպրոցի ժամանակավոր պաշտոնակատար Դիանա Մինասյանը հերքեց, որ որևէ ընդհանրություն ունի Տիգրան Ավինյանի հետ, սակայն չհերքեց , որ քույրն աշխատում է ՀՀ կառավարությունում ։

Նշենք, որ Երևանի Ա. Չեխովի անվան հ.55 հիմնական դպրոցի տնօրենի պաշտոնի թափուր տեղի համար անցկացվում է հերթական մրցույթը։  Երկուշաբթի եղել է մանկավարժական խորհրդի նիստ, որի ընթացքում ընտրել են ուսուցիչները, հաջորդ օրը` ծնողները, իսկ  այսօր  ընտրություն է  կատարում խորհուրդը, որը կազմված է 9 անդամից. երկուսը մանկավարժներ են, երկուսը` ծնողներ, չորսը՝  լիազոր մարմնի ներկայացուցիչներ:

 Հիշեցնենք, որ նախկին տնօրեն Գայանե Սարուխանյանի պաշտոնավարման պայմանագիրը լրացել է դեկտեմբերի 15-ին, որից հետո , քաղաքապետի որոշմամբ, պաշտոնակատար է նշանակվել նույն դպրոցի երկարամյա մանկավարժ Տաթևիկ Մելքոնյանը՝  մինչև մրցույթի կայանալն ու վերջնական արդյունքների հրապարակումը։  Սակայն  Տաթևիկ Մելքոնյանին հայտնել են, որ ինքն այլևս պաշտոնակատար չէ, փոխարենը նշանակվել է մեկ ուրիշը, որը քաղաքապետի ՔՊ-ական թեկնածու Տիգրան Ավինյանի ընկերոջ կինն է՝ Դիանա Մինասյանը, և տնօրենի ընտրության առաջին փուլում գրանցել է զրո արդյունք։