2.5 միլիարդ դոլար՝ կորոնավիրուսի դեմ պայքարի համար. ԱՄՆ կոնգրեսի որոշում

Փետրվարի 24-ին ԱՄՆ վարչակազմը 2.5 միլիարդ դոլարի ֆինանսավորում տրամադրելու հայց է հղել Կոնգրեսին` նոր անհայտ տեսակի կորոնավիրուսի դեմ պայքարի նպատակով. գրում է ՏԱՍՍ-ը՝ վկայակոչելով Սպիտակ տան վարչական-բյուջետային վարչության տարածած հայտարարությունը. հայտնում է Yerkir.am-ը:

«ԱՄՆ վարչակազմը 2.5 միլիարդ դոլարի լրացուցիչ ֆինանսավորման ծրագիր է ուղղել Կոնգրեսին` պատվաստանյութի մշակման արագացման, հիվանդության դեմ պայքարի միջոցառումների արդյունավետության բարձրացման, ինչպես նաև անհրաժեշտ սարքավորումների ու նյութերի ձեռքբերման համար»,- ասվում է փաստաթղթում ու հավելվում նաև, որ մոտ 1 միլիարդ դոլար կհատկացվի ուղղակիորեն պատվաստանյութի մշակման համար:

Միևնույն ժամանակ վարչությունում հստակեցրել են նաև, որ իրենք ազատում են առկա ռեսուրսներն ու ընդլայնում վիրուսին արձագանքման հնարավորությունները: Այս միջոցառումների համար Սպիտակ տունն առաջարկում է նպատակի իրագործման համար ուղղել 1.3 միլիարդ դոլարի չափով չօգտագործված միջոցները, ինչպես նաև դրանց ավելացնել ևս 1.2 միլիարդ դոլար: Խոսքը վերաբերում է, մասնավորապես, էբոլա վիրուսից առաջացած հիվանդության դեմ պայքարի համար օրենսդիրների կողմից հատկացված գումարներին:

Հավելվում է նաև, որ արդեն չորեքշաբթի օրը Ներկայացուցիչների պալատում տեղի կունենան բաց լսումներ Պետդեպարտամենտի ու առողջապահության նախարարության ներկայացուցիչների մասնակցությամբ:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվը Չինաստանում ավելացել է 150-ով՝ հասնելով 2592-ի: Երկրում գրանցվել է վարակման ավելի քան 77.100 դեպք, որից ավելի քան 24․700 մարդ առողջացել է։