Եթե չլինեին 22 միլիարդ ներդրումները, 25 միլիարդ կորուստները, 6,5 միլիարդ աշխատավարձը, այսօր այս վիճակը չէր լինի. Ռ. Նազարյան

Այսօր` էլեկտրաէներգիայի սակագնի բարձրացման հարցով խորհրդարանական լսումների ժամանակ, ՀԾԿՀ նախագահ Ռոբերտ Նազարյանն անդրադարձավ այն մեղադրանքներին, որոնք հնչեցրել է ՀԷՑ-ի ղեկավար Եվգենի Բիբինն իր հարցրազրույցներից մեկում: Նա էներգետիկ համակարգում առաջացած վիճակի համար մեղադրել է կառավարությանը, քննադատել նրա վարած քաղաքականությունը: Նշենք, որ ՀԷՑ-ի ղեկավարն անհրաժեշտ չի համարել ներկայանալ լսումներին:

Ռոբերտ Նազարյանը նշեց, որ մանրամասն կանդրադառնա Բիբինի հնչեցրած մեղադրանքներին, մնացածը թող պատգամավորները որոշեն` ով է ճիշտ, ով է սխալ: Մասնավորապես` վատ մենեջմենթի հետ կապակցությամբ նա ասաց, որ 2007-2015թթ. ընթացքում ՀԷՑ-ը կատարել է 102 միլիարդ դրամի ներդրումներ, որոնք կոչված էին լավացնել ծառայությունների որակը, կրճատել վթարային վիճակները: «Այդ ներդրումների ժամանակ մոտ 22 միլիարդ դրամ մեր կողմից չի ընդունվել` որպես ներդրում, երկու պատճառով: Այն, որ ներդրումներ կատարելիս ՀԷՑ-ը գնումներ է կատարել ավելի բարձր գներով, քան տվյալ ժամանակահատվածի շուկայական գներն են եղել: Երկրորդ պատճառն այն է եղել, որ ակնկալվող արդյունքները, որոնք պետք է լինեին ներդրումների ժամանակ, մենք չարձանագրեցինք: Եվ չընդունելով այդ 22 միլիարդ դրամը` որպես ներդրում, դա իրենց շահույթի հաշվին է փակվել, սակագնում դա չի արտացոլվել»,- ասաց Ռոբերտ Նազարյանը:

Անդրադառնալով ՀԷՑ-ի փաստացի կորուստներին` նա նշեց, որ 2007-2015թթ. ընթացքում դրանք կազմել են 25 միլիարդ դրամ:

Ինչ վերաբերում է ՀԷՑ-ի ներկայացուցիչների աշխատավարձերին, Նազարյանը հայտնեց, որ յոթ տարիների ընթացքում իրենց շահույթի հաշվին 6 միլիարդ 500 միլիոն ավելի աշխատավարձ են վճարել, քան նախատեսված է եղել սակագներով:

«Սրանք լրջագույն թվեր են, եթե դրանք չլինեին` 22 միլիարդ ներդրումներ, 25 միլիարդ կորուստներ, 6,5 միլիարդ աշխատավարձ, այսօր այս վիճակը չէր լինի, հավատացնում եմ ձեզ: Կլիներ այն վիճակը, որի մասին հրապարակային խոսում եմ, կլիներ այն 37 միլիարդ դրամը` պայմանավորված սակավաջրության ու ատոմակայանի երկարաժամկետ կանգնելու արդյունքում»,- ասաց Նազարյանը և հավելեց, որ ՀԾԿՀ-ն պարտադրելու է բոլոր արտադրող կայաններին` տարին մեկ անգամ անկախ աուդիտ անցկացնել: