«Բոլորի դեմ, բացի Պուտինից». Պենտագոնը կիբերհարձակում է նախապատրաստում Ռուսաստանի ղեկավարության դեմ

Պենտագոնը մշակում է ՌԴ պաշտոնական ներկայացուցիչների դեմ տեղեկատվական պատերազմի մարտավարությունը: Դա անհրաժեշտ է, եթե «նրանք փորձեն միջամտել» 2020-ին անցկացվելիք ԱՄՆ նախագահական ընտրություններին. ըստ yerkir.am-ի՝ գրում է The Washington Post-ը՝ իր աղբյուրներին հղումով:

Որպես հնարավոր գործողություն՝ Պենտագոնը դիտարկում է ռուսաստանյան ղեկավարության դեմ՝ ներառյալ բանակի հրամանատարությունը, հատուկ ծառայությունները և «օլիգարխները», կիբերհարձակումները, ընդ որում, ըստ թերթի աղբյուրի, ՌԴ նախագահ Վլադիմիր Պուտինին դա չի վերաբերի, քանի որ նման քայլը կհամարվի «չափազանց մեծ սադրանք»: Իսկ գործողության նպատակը հարձակման օբյեկտին հասկացնելն է, որ ԱՄՆ նախագահական ընտրություններին միջամտության դեպքում նրա գաղտնի անձնական ինֆորմացիան հանրության սեփականությունը կդառնա:

Ըստ թերթի՝ ԱՄՆ ԶՈւ կիբերհրամանատարության մարտավարությունն ընդհանուր առմամբ ռուսաստանյան հասարակության վրա ազդելու փորձեր չի ներառում: Իհարկե, պաշտոնյաների կարծիքով, այդ գործողությունը սահմանափակ հաջողություն կունենա՝ հաշվի առնելով «Պուտինի վերահսկողությունը երկրի, այդ թվում՝ ԶԼՄ-ների մեծ մասի վրա»: Որոշ վերլուծաբաններ էլ համոզված են, որ նոր միջացառումը բավականին արդյունավետ կլինի՝ կփոխի երկրի ղեկավարության պահվածքը:

Թերթը գրում է, որ «ռուսական միջամտության» պարագայում ամերիկացի զինվորականները հնարավոր է կիրառեն գործողությունների ևս մեկ տարբերակ՝ ապատեղեկատվություն կտարածեն, որը պառակտում կառաջացնի կառավարությունում և իշխող վերնախավում:

Ի դեպ, Պենտագոնի ներկայացուցիչները հրաժարվել են մեկնաբանել թերթի տեղեկությունները:

Ամերիկացի զինվորականները բազմիցս կիրառել են հոգեբանական գործողություններ: Օրինակ՝ Պարսից ծոցում պատերազմի ժամանակ հարյուրհազարավոր թռուցիկներ էին տարածել Իրաքում, որպեսզի կառավարական ուժերին համոզեն հանձնվել: Իսկ ինտերնետը, սոցիալական ցանցերը և սմարթֆոնները ընդլայնել են այդ մարտավարության ընդգրկումն ու ճշգրտությունը: