Շերլոք Հոլմսի մասին պատմող բոլոր գործերը՝ հայերեն

Հավաքածուն ընթերցողին են ներկայացնում «Կարապ» և «Էդիթ պրինտ» հրատարակչությունները:

Հոլմսի մասին բոլոր գործերն առաջին անգամ բնագրից հայերեն են թարգմանել վեց թարգմանիչները՝ Արփինե Վարդանյանը, Էլիզա Սարգսյանը, Էդիտա Շադոյանը, Շուշան Փայտյանը, Շուշաննա Վասիլյանը, Քրիստինե Չիլինգարյանը:

Շերլոք Հոլմսն ի հայտ է գալիս Արթուր Կոնան Դոյլի 56 պատմվածքում ու 4 վեպում: Հիմնականում պատմությունը ներկայացվում է Հոլմսի լավագույն ընկերոջ և ընկերակից բժիշկ Վաթսոնի անունից: Հեղնաեկը ժամանակին համարում էր Հոլմսի մասին պատմվածքները «թեթև գործեր» և չէր կիսում ընթերցողների հիացմունքը։ Ավելին՝ նրան դուր չէր գալիս այն, որ ընթերցողները գերադասում էին Հոլմսի մասին ստեղծագործությունները գրողի մյուս բոլոր գործերից, այն ժամանակ, երբ Կոնան Դոյլն իրեն համարում էր ի սկզբանե պատմական վեպի հեղինակ։

Վերջ ի վերջո Դոյլը որոշում է ավարտել խուզարկուի պատմությունը՝ վերացնելով աշխարհահռչակ գրական կերպարին պրոֆեսոր Մորիարտիի հետ պայքարում Ռեյխենբախի ջրվեժի մոտ: Սակայն հետո վրդովված ընթերցողների նամակների շարանը, որոնց մեջ էին մտնում արքայական ընտանիքի անդամները (ըստ լեգենդի՝ ինքը՝ Վիկտորյա թագուհին), ստիպում են գրողին «վերակենդանացնել» հայտնի խուզարկուին և շարունակել նրա արկածների պատմությունը։

Նոր հավաքածուն աննախադեպ է նախ այն առումով, որ վեց գրքերը թարգմանվել են միանգամից բնագրից: Մյուս կողմից՝ այն ներառում է Հոլմսի մասին պատմող բոլոր գործերը՝ առանց բացառությունների: