2018-ին աղքատության ցուցանիշը չի նվազի. Գագիկ Մակարյան

Հայաստանում գնաճի կարգավորման մեխանիզմները լավ չեն կիրառվում. այսօր լրագրողներին կարծիք հայտնեց Գործատուների հանրապետական միության նախագահ Գագիկ Մակարյանը: Ըստ նրա՝ ամեն տարի, իմանալով, որ գնաճ է սպասվում, կառավարությունն այդպես էլ համապատասխան քայլեր չի անում ու կանխարգելիչ մեթոդների չի դիմում:

Գնաճով պայմանավորված, ըստ Մակարյանի, ընթացիկ տարում աղքատության ցուցանիշը չի նվազի: «2018-ին աղքատության՝ 30 տոկոս ցուցանիշը չի նվազի: Աղքատության կանխարգելման համար առաջնային է զբաղվածության խթանման հրատապ գործողությունների պլանավորումը, սակայն մենք չունենք հրատապ մեխանիզմներ: Ի դեպ, հրատապ մեխանիզմների իրականացման շնորհիվ հնարավոր կլինի ընթացիկ տարում գործազրկության մակարդակը նվազեցնել 9 տոկոսով»,- ասաց նա:

Մակարյանը նշեց նաև, որ աղքատության կանխարգելման կարևոր գործոններից մեկն էլ տուրիզմի զարգացմանը զարկ տալն է: Հարևան Վրաստանում, նրա խոսքով, տուրիստների հոսքը նախորդ տարի հասել է 9 միլիոնի, ինչը հսկայական եկամուտ է բերել երկրին: