Կայարանցի Թևոսիկի եղբոր սպանության գործով դատախազը կրկին 25 տարվա ազատազրկում պահանջեց

Այսօր՝ քրեական հեղինակություն Կայարանցի Թևոսիկի եղբոր՝ Արթուր Սաֆարյանի սպանության գործի վերսկսումից երեք ամիս անց, մեղադրող դատախազը հրապարակեց այս գործով նոր մեղադրական ճառը:

Շուրջ երեք ժամ տևած հրապարակման ընթացքում մեղադրողը դարձյալ միջնորդեց մեղավոր ճանաչել Իսրայել Սարգսյանին: Նա ամբաստանյալի համար 25 տարի ազատազրկում պահանջեց՝ նշելով, որ նրա պատիժը և պատասխանատվությունը մեղմացնող կամ ծանրացնող հանգամանքներ գործում առկա չեն:

Ի պատասխան դատախազի 60 էջանոց ճառի, Իսրայել Սարգսյանն արձագանքեց. «Եթե պիտի կարդար 25 տարի, թող միանգամից ասեր 25»: Իսրայել Սարգսյանը խոստացավ հաջորդ դատական նիստին հանդես գալ ճառով և վերջին խոսքով:

Հիշեցնենք, որ այս տարվա հունիսի 22–ին դատավոր Արմեն Բեկթաշյանը պետք է հրապարակեր այս գործով դատավճիռը, սակայն նա անսպասելի որոշում կայացրեց դատաքննությունը վերսկսելու վերաբերյալ:

Հիշեցնենք, որ սպանությունը տեղի էր ունեցել 2014-ի հունվարի 26-ի լույս 27-ի գիշերը: Համաձայն գործի նյութերի, Իսրայել Սարգսյանը Մովսես Ներսիսյանին է պատվիրել Արթուր Սաֆարյանի սպանությունը, ապա Մովսեսին սպանել Դավթաշենում գործող «Մագնում» հյուրանոցում և դիակը տեղափոխել ու նետել Զովունի- Քանաքեռավան տանող ճանապարհին գտնվող կոյուղու դիտահորը:

Մոսոյի դիակն այդպես էլ մինչ օրս չի հայտնաբերվել, իսկ ամբաստանյալ Իսրայել Սարգսյանը պնդում է, որ Իսոն ողջ է, և ինքն է այնպես արել, որ նա հեռանա երկրից: Իսրայել Սարգսյանը նախքան ձերբակալվելը եղել է «Դուքենդո» կարատեի ֆեդերացիայի անվտանգության ծառայության պետը, իսկ 1998թ-ին դատապարտվել է Արմեն Տեր-Սահակյանի հայտնի բանդայի կազմում սպանություն և սպանության փորձ կատարելու համար: