Կայարանցի Թևոսիկի եղբոր սպանության գործով մեղադրյալին չէին բերել դատարան

Կայարանցի Թևոսիկի եղբոր՝ Արթուր Սաֆարյանի սպանության գործով այսօրվա դատական նիստը սկսվեց 1 ժամ ուշացումով: Ըստ նիստը նախագահող դատավոր Բեկթաշյանի՝  պատճառը ամբաստանյալին սպասելն էր, որին, ինչպես հայտնի դարձավ, չէին բերել դատարան: Իսրայել Սարգսյանի չներկայանալու վերաբերյալ դատարանը որևէ գրություն չէր ստացել:

Այսպիսով` Կենտրոն և Նորք-Մարաշ վարչական շրջանների ընդհանուր իրավասության դատարանում քննվող այսօրվա դատական նիստը  հետաձգվեց, հաջորդը նշանակվեց  հուլիսի 17-ին:

Հիշեցնենք, որ Իսրայել Սարգսյանին մեղադրանք է առաջադրվել այն բանի համար, որ նա կազմակերպել և օժանդակել է Մովսես Ներսիսյանի կողմից Արթուր Սաֆարյանի սպանության կատարմանը, ապա այդ հանցանքը թաքցնելու նպատակով ապօրինաբար, դիտավորությամբ զրկել է կյանքից Մովսես Ներսիսյանին, բացի այդ` ապօրինի ձեռք է բերել և կրել հրազեն հանդիսացող ատրճանակ և ռազմամթերք հանդիսացող 3 փամփուշտ, ինչպես նաև ապօրինի ձեռք է բերել ու պահել ռազմամթերք հանդիսացող` նպատակային օգտագործման համար պիտանի, գործարանային արտադրության 4 ճայթիչներ և նետողական պայթուցիկ նյութերի շարքին դասվող` գործարանային արտադրության դեղնաշագանակագույն և շագանակագույն գլանաձև արկային վառոդի` թվով 5 հատիկ: