Նախորդ գումարման ԱԺ-ի ընդդիմությունն ի՞նչ է արել. Գևորգ Գորգիսյան

Բոլորն են նկատել, որ 2016 թ. բյուջեի կատարողականի քննարկման և ԱԺ մշտական հանձնաժողովներում զեկույցների ներկայացման ժամանակ ընդդիմադիր պատգամավորները սուր հարցադրումներ չեն անում: Կառավարության անդամներին և տարբեր զեկուցողների հարցեր տալիս են հիմնականում իշխող Հանրապետականի անդամները:

Արդյո՞ք 6-րդ գումարման ԱԺ-ի ընդդիմությունն ավելի թույլ է, քան նախորդ գումարման ԱԺ-ինը, ինչո՞ւ ընդդիմադիրների կողմից չկան սուր հարցադրումներ, այս և այլ հարցերի շուրջ Yerkir.am-ը զրուցել է ԱԺ «Ելք» խմբակցության քարտուղար Գևորգ Գորգիսյանի հետ:

-Պարո'ն Գորգիսյան, բյուջեի կատարողականի քննարկման ժամանակ չկան նախորդ տարիների սուր հարցադրումները, ինչո՞ւ, ամեն ինչ շատ լա՞վ է:

-Կատարողականը շատ սիրուն ներկայացված է: Փորձել են ամեն կերպ հիմնավորել, թե ինչու ավելի լավ չէր կարող լինել: Հիմնավորվում է նաև, թե կարող էր ավելի վատ լինել, բայց իրենց ջանքերի շնորհիվ ավելի վատ չէ: Անընդունելի մոտեցում եմ համարում: Մանրամասն ուսումնասիրում ենք հիմա բյուջեի կատարողականը:  Բազմաթիվ թվեր են, աղյուսակներ, այդ ամենից դեռ պետք է գլուխ հանել:  Բացի այդ` մեր հռետորաբանության մեջ առանձնապես չկա փնովելը փնովելու համար: Հիմա ուսումնասիրում ենք: Առաջին հայացքից հիմնական շեշտը դրված է նրա վրա, որ մեզ մոտ ամեն ինչ վատ էր, որովհետև աշխարհում եղել է տարբեր հանքանյութերի գների անկում, այդ թվում նավթն էին նշում:  Բյուջեի կատարողականից երևում է, որ մեր ամբողջ տնտեսությունը կախված է ռուսական շուկայից, և որպես հիմնական պատճառ, որ տնտեսական աճ չկա, նշվում է, որ ռուսական շուկայում ճգնաժամ է: Ամենամեծ ռեսուրսը, որ մենք հիմա արտահանում ենք երկրից, աշխատուժն է, որը հիմնականում արտահանվում է ռուսական շուկա, որտեղ ցանկացած տնտեսական տատանում շատ լուրջ ազդեցություն է ունենում մեր տնտեսության վրա, տրանսֆերտները նվազում են, և տնտեսությունն անկում է ապրում: Սա անթույլատրելի է, և տարիներ շարունակ այս վիճակն է:

-Այս հարցերը ինչո՞ւ չեք բարձրացնում քննարկումների ժամանակ:

-Լինելու է նիստ, որտեղ բոլոր հարցերն ավելի մանրամասն կտրվեն: Հանձնաժողովներում հանձնաժողովի լիազորության շրջանակում հարցերի քննարկման տեղ է: Ավելի քաղաքական կոնտեքստ չեմ կարծում, թե պետք է լինի:

-Կարծիք կա, որ նախորդ գումարման ԱԺ-ի ընդդիմությունն ավելի ուժեղ էր, իսկ հիմա խորհրդարանական ընդդիմությունը շատ թույլ է:

-Ժամանակը ցույց կտա: Կարո՞ղ եք հուշել, թե նախորդ գումարման ԱԺ-ի ընդդիմությունն ի՞նչ է արել, որևէ բան մեր երկրի համար արե՞լ է, ինչ-որ նյութական հետք թողե՞լ է:

-Ձեր խմբակցությունում էլ հիմա երկու պատգամավոր կա, որ նախորդ գումարման ԱԺ-ի ընդդիմադիրներից են, այսինքն` ստացվում է, որ նրանք էլ ոչինչ չեն արել:

-Նրանք անձամբ շատ բան են արել, բայց, նրանցից բացի, այլ ընդդիմադիր ուժերը շատ քիչ բան են կարողացել անել և ազդել գործընթացների վրա: Մենք արդեն իսկ սկսել ենք ազդել:  Չմոռանանք` դեռ մեկ ամիս է, և լիագումար նստաշրջան դեռ չի էլ եղել: Մենք հիմա պատրաստվում ենք սեպտեմբերի նստաշրջանին:

-Գուցե հանձնաժողովներում բյուջեի կատարողականի քննարկման ժամանակ սուր հարցադրումներ չեն եղել այն պատճառով, որ 2016 թվականի բյուջեի կատարողականի պատասխանատուն նախորդ վարչապետ Հովիկ Աբրահամյանն է և ընդդիմությունը չի՞ ցանկանում «ճնշել» Կարեն Կարապետյանին:

-Մասամբ են նախորդ վարչապետինը: Միգուցե նաև դրանից է կախված, որ չկան սուր քննադատություններ, որովհետև կառավարության նախագծի քննարկման ժամանակ կային հարցադրումներ, որոնք վերաբերում էին հենց գործող անձանց: Հիմա միգուցե դա էլ է պատճառը, որ մարդը, ով պետք է պատասխան տար այդ ամենի համար, չկա ասպարեզում:

-Կարո՞ղ ենք ասել, որ ձեր խմբակցությունն այդ պատճառով սուր հարցադրումներ չի անում:

-Չէ: Մեր խմբակցությունը դեռ սուր հարցադրումներ կանի: Հանձնաժողովների քննրակման ժամանակ դրա կարիքն ուղղակի չկա: Սուր հարցադրումները` բոլորը, քաղաքական բնույթի են: Մինչև հիմա մեր կառավարությունների կողմից ներկայացված բոլոր բյուջեների կատարողականները միևնույն ոգով են եղել` թե ինչու չստացվեց տնտեսական աճ գրանցել, թե ինչու չհաջողվեց երկրում թռիչքային աճեր ապահովել: Օրինակ` երբ մենք կառավարության ծրագիրը քննադատում էինք, հարցնում` ինչպես եք անելու, բայց հարցի պատասխանը չկար: Միայն նշվում էր` լավ բաներ պետք է արվեն: Հետո բերելու են 17 թվականի բյուջեի կատարողականը` իր բազմաթիվ հիմնավորումներով, թե ինչու այդ ամենը չստացվեց: Մեզ դա չի բավարարում:  Այդ «ինչու չի ստացվելը» մեզ չի հետաքրքրում` մեծ հաշվով: Մեզ հետաքրքրում է` ինչ պետք է անենք, որ այն ծրագրերի առնվազն մի մասը, որ կառավարությունը դրել է իր առջև, կարողանա կյանքի կոչել: Կոնկրետ ես ամեն օր պահանջելու եմ նրանցից դա, ես ամեն օր հետամուտ եմ լինելու, որ եթե իրենք իրենց գրած պլանով չշարժվեն, ուրեմն պատասխան տան դրա համար: Ի վերջո, եթե նրանք դա էլ չկարողացան անել, պետք քաղաքական դաշտից հեռանան:

-Դուք դեմ եք քվեարկել ծրագրին, բայց ձեր խոսքերից ստացվում է` ծրագիրը լավն է, և դուք հետևողական եք լինելու դրա իրականացմանը:

-Դեմ ենք քվեարկել, որովհետև այն ավելի շատ կենաց էր հիշեցնում` պետք է լինի տնտեսական աճ, պետք է լինի տուրիզմի զարգացում, Սփյուռքից պետք է ներդրումներ գան, բայց թե ինչպե՞ս, այդ հարցի պատասխանը չկար: Բացի դրանից` մեր` դեմ քվեարկելու վրա լուրջ ազդեցություն ունեցավ, թե ով է այդ ծրագրի պատասխանատուն: Որովհետև Հանրապետական կուսակցությունը չունի վստահության այն պաշարը, որ որևէ մեկը նրանց վստահի և հավատա, որ այդ ծրագիրը կյանքի կկոչվի:

-Եթե ծրագիրը Կարեն Կարապետյանինը լիներ, վստահությո՞ւնն էլ կլիներ:

-Կարեն Կարապետյանը բերվեց Հայաստան` որպես թարմ դեմք, և նրանով ՀՀԿ-ն հավաքեց իր ձայները, ամբողջ քարոզարշավը կազմված էր նրա շուրջ: Եվ եթե նրանք հայտարարում են, որ ստացել են վստահության քվե, պետք է ազնիվ լինեն և ասեն, որ այդ քվեն ստացել են անհատներ, որոնց հիմա խաղից հանում են:

Զրուցեց Ամալյա Առաքելյանը