Եթե մեջլիսում սահմանադրական փոփոխությունները չընդունվեն, պետք է նոր խորհրդարան ձևավորել. Բահչելի

Թուրքիայի ընդդիմադիր «Ազգայնական շարժում» կուսակցության (ԱՇԿ-MHP) նախագահ Դևլեթ Բահչելին անդրադարձել է մեջլիսում սահմանադրական փոփոխությունների առաջարկի քննարկմանը. տեղեկացնում է Ermenihaber-ը:

Թուրքական Haberturk լրատվական կայքի տեղեկացմամբ՝ Բահչելին նշել է, որ եթե մեջլիսում հարցի շուրջ առկա լարվածությունը շարունակվի, ապա այդ իրավիճակը հանրաքվեի ժամանակ կարող է անդրադառնալ ամբողջ Թուրքիայի վրա:

Մեջլիսում քննարկման ժամանակ տեղի ունեցած ծեծկռտուքի մասին խոսելիս նա նշել է, որ լարվածությունը պետք է նվազեցնել, վիրավորական արտահայտություններից խուսափել:

Բահչելին ընդգծել է, որ եթե սահմանադրական փոփոխությունները խորհրդարանում չհաստատվեն, անհրաժեշտ կլինի նոր խորհրդարան ձևավորել:

Նշենք, որ ԱՇԿ-ն կողմ է սահմանադրական փոփոխություններին և այդ հարցի շուրջ համաձայնության է եկել իշխող «Արդարություն և զարգացում» կուսակցության (ԱԶԿ-AKP) հետ: Սահմանադրական փոփոխություններով` նախատեսվում է կառավարման խորհրդարանական համակարգից անցնել նախագահական համակարգի: